Ish-kryeministri Berisha ka shkuar mesditën e sotme në selinë blu, i rrethuar nga mbështetësit, ku do të mbanin mbledhjen e parë të Komisionit të Rithemelit, ngritur në 11 dhjetor në Kuvend. Në zyrën ngjitur ndodhej kreu i PD-së, Lulzim Basha, i cili drejtonte mbledhjen për raportimin e Grupit të Punës për zgjedhjet në FRPD, të cilin e vazhdoi përtej asaj që po ndodhte në seli.
Sali Berisha tha se ai nuk ka punë në zyrën e “deputetit Basha”, siç e ka quajtur ai, teksa ka komentuar edhe kallëzimin në SPAK që u bëri PD-ja 5 zyrtarëve demokrat.
Mbledhja e Berishës ka zgjatur vetëm pak minuta. Ende nuk ka informacione se për çfarë është diskutuar në këtë mbledhje, ndërsa anëtarët e Komisionit kanë lënë ambientet e zyrës në selinë e PD-së ku u zhvillua mbledhja.
Një moment tensioni është regjistruar në seli, ku një nga mbështetëset e Lulzim Bashës, thërriste “Basha”, teksa ka ngritur akuza se i kanë bërë presion. Julian Deda, i cili është mbështetës i Berishës, është mundur që të qetësojë zonjën në fjalë.
Mbështetësja e Bashës pretendon se është tërhequr zvarrë nga mbështetësit e Berishës.
Demokratja: Ca i bëra unë, të ma thonë! S’po bëj asnjë skandal, as s’po gjuaj, as s’po shaj, më bënë presion, nuk i kam asnjë faj askujt, kam ardhur për punën time. Kush ka punë personale me mua, le të vij. Unë nuk i kam asnjë faj askujt, më thanë do të tërheqim zvarrë, le të vinë këtu, nuk i kam frikë.
Jul Deda: Hajde me mua, unë jam me ty
Demokratja: Jo mor burrë, ti s’je me mua
