Me thirrjet “bojkoto mësimin online”, studentët vijojnë që të refuzojnë zhvillimin e mësimit larg auditoreve. Protesta e studentëve vijon në ditën e dytë të saj. Sipas studentëve, ky proces mund të vështirësohet për shkak të mungesës së kushteve në disa raste, pasi nuk është efektiv për degët praktike. Në lidhje me këtë vendim, kryeministri Rama deklaroi se është zgjedhur mësimi në distancë, për shkak se të rinjtë kanë një rol shumë të madh në transmetimin e sëmundjes. Sa i përket konvikteve, Rama tha se ata që nuk do të duan që të qëndrojnë më aty kur të hapen, do t’u rikthehen paratë.
“Kjo situatë është luftë dhe jo një situatë ku mund të aplikosh në afatgjatë, këto masa nuk vijnë si rezultat i dëshirës. Këto vijnë si rezultat i kurbës së numrave. Në të gjithë vendet që flasim, mësimi bëhet online.
Nuk kemi ndaluar mësimin, kemi thënë që do të bëhet në distancë për shkak se të rinjtë luajnë një rol shumë të madh negativ në transmetimin e infeksionit, për shkak se shumica e tyre janë asimptomatikë dhe për shkak se janë të pritur që të mos respektojnë me rigorozitet masat dhe marrin në qafë njerëzit më të rritur të familjes.
Natyrisht që tarifat e paguara për konviktet do të mbahen për muajt e tjerë, nëse vijnë në konvikt ose do t’u kthehen një për një se nuk është hotel privat. Ajo që është e sigurt është që nuk po bëjmë asgjë të veçantë dhe asgjë befasuese nga ç’po bëjnë të tjerët.
Kjo është një histori ku të gjithë punojnë duke hedhur çdo ditë nga një hap. Askush nuk bën plane afatgjatë. Shikoni Francën. U bë çdo përpjekje për të shmangur këtë që ndodhi”.
Kryeministri u shpreh se duhet shmangur me çdo kusht një mbyllje e përgjithshme dhe e pjesshme.
“Duhet të shmangim me çdo çmim mbylljen e përgjithshme, apo qoftë edhe mbylljen e pjesshme të një zone. Çmimi nuk është aspak i lartë. Çmimi është të vëmë maskën. Një pjesë e kanë bërë maskën si shall. Të vemë maskën, të ruajmë distancën dhe të evitojmë vendet ku ka njerëz. Duket sikur nuk ndodh, por aty ndodh”, tha Rama.
