“Arrest me burg” është masa e caktuar për autorin e vrasjes makabre të 8-vjeçarit Mateo Vasiu, ngjarje e cila ndodhi dy ditë më parë. Seanca gjyqësore është zhvilliar pa praninë e autorit 38 vjeçar, Klodian Çalamani.
Bëhet me dije se nga policia është marrë deklarata e tij, ku ka shprehur vullnetin që gjykimi të behej në mungesë të tij. Nga trupi gjykues me pjesëmarrjen e gjyqtares Sonila Hoxha dhe prokuror Clirim Sino, është caktuar masa e sigurimit “arrest me burg”.
Klodian Çalamani, vrau dhe groposi 8-vjeçarin Mateo Vasiu në fshatin Grecalli të Fierit më 16 nëntor. Familjarët e Mateos, shkaktuan tensione në gjykatë, pasi nuk u lejuan nga policia.
Ata hynë me forcë deri në ambientet e brendshme të Gjykatës së Fierit, por uniformat blu i larguan prej andej.
Në mbështetje të familjarëve janë bashkuar edhe qytetarë të tjerë. Familjarët e të ndjerit kërkojnë rikthimin e dënimit me vdekje, për vrasësin e djalit të tyre. Nëna e Mateos ka kërkuar që vrasësi të varet, dhe ta shikojë e gjithë bota.
Pas caktimit të masës “arrest me burg” nga gjykata për autorin, nëna e 8-vjeçarit me lot në sy u shpreh se nuk do jetë e qetë derisa të vendoset drejtësi.
“Do qetësohem kur të varet në mes të Fierit. Duan ta varin, ta djegin. Më mori një foshnjë, një 8-vjeçar. Ma ndau nga shokët e shoqet. Na hoqi nga shkolla. Ma gënjeu, ma mashtroi…I tha; ‘Mateo më bli një bukë’. Ia çoi. I tha ‘do iki te shpia se kam vëllain sëmur’, por si i kërkoi të futej brenda. Ja futi me lopatë dhe e la të vdekur.
Ma groposi, i hodhi dhe nga lart dhe sikur nuk ndodhi gjë. Kur shkoi në polici tha se; do e gjeni më duket copa-copa. Unë dua ta ndjekin tani në mes të Fierit, të jem e ngopur dhe t’i them çunit që; ‘e mora hakun’. Unë do rri këtu, nuk iki unë si nënë”, tha ajo.
