Dhëndri i Berishës, Jamarbër Malltezi është larguar nga kryesia e Partisë Demokratike. Malltezi me rastin e miratimit të statutit të ri thekson se ky përjashtim është bërë për rishikimin e anëtarësisë së kryesisë dhe nuk ka aspak lidhje me sulme politike brenda llojit në PD.
Në një intervistë ekskluzive për Tirana Today, Malltezi deklaroi se “statuti është absolutisht një gjë shumë e mirë që duhet të rishikohet sipas nevojave të çdo partie. Nuk kemi të bëjmë më largimin timin apo të atyre që aktualisht jemi drejtues departamentesh. Ka të bëjë më rishikimin e anëtarësisë së kryesisë.”
Gjithashtu, Malltezi theksoi se të gjithë demokratët duhet të bashkohen për të qenë së bashku për të luftuar krimin dhe trafikun e drogës me të cilin është e përfshirë e gjithë qeveria aktuale. Ai ritheksoi edhe njëherë se Basha është ai që monitoroi të gjithë procesin për ndryshimet në statut me cilësinë e kryetarit të demokratëve. Malltezi bën thirrje se duhet të ecet përpara duke i dhënë një mbështetje të hapur dhe publike Lulzim Bashës. Me këtë deklaratë Malltezi i beri të ditur të gjithë demokratëve të tjerë se Basha nuk duhet sulmuar.
“Nuk është mirë që neve të sulmojmë njeri tjetrin kur ne përballë kemi krimin e organizuar. Acarimet dhe komentet e tepërta nuk i bëjnë mirë as Shqipërisë dhe as Partisë Demokratike.
PD-ja ka kaluar në një proces zgjedhjesh ligjore dhe ka drejtimin e saj nën drejtimin e zotit Basha. Kthimi mbrapa nuk i bën mirë. Ne duhet që të shohim përpara,” theksoi Malltezi.
Ndërkohë, Malltezi foli edhe për liderin historik të PD-së, Sali Berisha i cili është dhe vjehrri i tij. Dhëndri deklaroi se Berisha merr vendimet e tij dhe nuk mund t’i komentojë as ai dhe as ndonjë tjetër.
“Zoti Berisha merr vendimet e tij dhe nuk mund t’i komentojë as unë as ndonjë tjetër,” deklaroi Malltezi.
Prej kohësh ish-kryeministri Berisha distancohet nga veprime të kryetarit të PD-së Basha. Ndoshta kjo është për t’i dhënë më shumë hapësirë dhe liri veprimi Bashës ose për të treguar që ai nuk mbështet çdo veprim të kryetarit. TIRANA TODAY
