Sot Kuvendi i Shqipërisë do të votojë për shkarkimin e presidentit Ilir Meta nga detyra. Parlamenti do të votojë sot raportin e Komisionit Hetimor, dhe kërkesën e deputetëve për shkarkim të Presidentit të Republikës.
Sipas Kushtetutës, në Parlament duhen 94 vota pro që Kreu i Shtetit të konsiderohet i shkarkuar dhe më pas vendimi i shkarkimit shkon për interpretim në Gjykatën Kushtetuese. Do të jetë kjo gjykatë si hallka e fundit që do të vendosë nëse kreu i shtetit do të qëndrojë në detyrë, apo do të mbyllë mandatin me herët se korriku i vitit 2022.
Komisioni Hetimor, që u drejtua nga Alket Hyseni, mblodhi prova kundër Presidentit dhe në raportin përfundimtar flitej për shkelje të Kushtetutës nga ana e kreut të shtetit.
Nisma për shkarkimin e Metës u bë për shkak të deklaratave të bëra nga ky i fundit gjatë fushatës elektorale për zgjedhjet e 25 prillit, që sipas maxhorancës shkelnin Kushtetutën.
