Zgjedhjet vendore të caktuara për t’u mbajtur më 30 Qershor, janë kryefjalë e aktualitetit në vend. Situata është vërtetë komplekse, në kuadër të krizës politike në vend, e cila nisi me djegien e mandateve të deputetëve të opozitës e që po vijon me protesta masive, shpesh të dhunshme e me të lënduar.
Ditën e nesërme, më 25 maj, opozita ka paralajmëruar se do të mbajë një tjetër protestë kombëtare, e gjashta e tillë, ku kërkohet largimi i kryeministrit Rama, krijimi i një qeverie tranzitore dhe mbajtja e zgjedhjeve të parakohshme.
Prej tre ditësh, kryeministri Rama i është drejtuar kryedemokratit Basha me anë të letrave publike, ku e fton për t’u ulur në një tryezë politike pa kushte, e për të dialoguar.
Përgjigja e Bashës ka qenë përherë refuzuese. Kushti kryesor i tij dhe i aleatëve është pikërisht largimi i kryeministrit Rama.
“Zgjedhje me Ramën nuk ka”, theksojnë me këmbëngulje personalitete të opozitës, e nga ana tjetër përgjigja e kryeministrit është po ashtu e prerë: “Pushtet në tavolinë nuk ka, qeveria e 30 qershori nuk ndryshojnë!”
Këtyre replikave u është përgjigjur sot me një deklaratë të fortë presidenti Meta, i cili duket se ka vendosur të bëjë lëvizjen e radhës lidhur me zgjedhjet e 30 qershorit.
Në një njoftim për mediat, presidenti njoftoi sot se “shpreh gatishmërinë time institucionale, që në përputhje me kompetencën që më jep shkronja “gj” e nenit 92 të Kushtetutës, të rishikoj Dekretin për caktimin e datës së zgjedhjeve vendore dhe të dekretoj një datë tjetër për zhvillimin e tyre, në përputhje me vullnetin e shprehur të palëve politike.”
Ky njoftim vjen një ditë pas deklaratës së Unionit Kristiandemokrat dhe Kristiansocial (CDU/CSU) për DW, ku sugjerohet shtyrja e datës së zgjedhjeve, pasi “pa pjesëmarrjen e opozitës, zgjedhjet janë problematike në aspektin demokratik”.
Gjasat janë që me këtë reagim të ndërkombëtarëve dhe presidentit, ky i fundit të dekretojë një datë tjetër për zhvillimin e zgjedhjeve vendore, sigurisht me vullnetin e shprehur të palëve politike.
Në këtë rast, një nga palët politike do duhet të tërhiqet e të mos vazhdojë më me ‘kokëfortësi’ duke kundërshtuar palën tjetër.
Por, a është e drejtë që data e caktuar e zgjedhjeve vendore të shtyhet për shkak të bojkotit nga opozita?
Tirana Today pyet qytetarët me anë të këtij sondazhi nëse mendojnë se në këto kushte, duhet të shtyhet data e zgjedhjeve vendore.
Klikoni linkun e mëposhtëm për të marrë pjesë në sondazh:
