Trajneri Ilir Daja pas ndeshje që Skënderbeu u mposht nga Vllaznia është shprehur se lojtarët janë dukur të pamotivuar në fushë dhe dukej sikur e kishin marrë shtruar. Kjo ka qenë pasojë e dënimit që i ka bërë UEFA ekipit korçarë, pasi dyshohet se ka manipuluar një sërë ndeshjesh. Kjo duket se do të ketë një ndikim të madh tek ekipi dhe tashmë rrezikon të kthehet në “Dinamo 2”, që të vazhdojë të mposhtet në disa ndeshje radhazi dhe si rrjedhojë mund të humbasë edhe vendin e parë.
Sa ka ndikuar vendimi i UEFA-s sot?
Pritej një farë mase nga UEFA, nga ajo që ishte trajtuar kohët e fundit, por jo në këto masa drastike që u morën. Për të sqaruar opinionin, sepse unë jam i fundit që mund të trajtoj situatën në lidhje me UEFA-n. Pozicioni im lidhet me një situatë në kushtet e dyshimit për ndeshje të disa viteve më përpara. Masa është gati përjashtim i përhershëm, pasi 10 vite pjesëmarrje do të thotë që gjithçka që ka bërë mirë Skënderbeu, duhet të mendohet në ekzistencën apo jo të klubit.
Kur futbolli është edhe biznes brenda, dikush do investonte ta çonte Skënderbeun këtu. Kjo situatë për 2 ditë ka ndikimin e vet, pasi sot lojtarët janë futur në fushë pa motivimin. Ndeshja ishte shumë shpejt në kohë. Tentuam të ndryshonim ndeshjet në lojë, bile në përfundim të pjesës së parë kam folur me tone të larta, në disa momente skuadra dukej sikur e kishte marrë me ngadalë. Kjo vjen edhe nga diferenca e pikëve ku ndodhemi. Shpresoj ta kalojmë të gjithë bashkë atë që kemi ndërtuar.
A rrezikon Skënderbeu të kthehet në një “Dinamo 2”, të humbasë ndeshje njëra pas tjetrës?
Ne në çdo fushë do shkojmë të paragjykuar. Kush e ka ndjekur lojën, ka parë që në fushë nuk ka pasur tolerim. Ekipi luan me akademizëm, por kur para 2 ditësh vjen një vendim drastik, është e vështirë që lojtarët të jenë të motivuar. Kemi pasur gabime plot, që nga fillimi në fund. Kjo mbetet për t’u parë. Kemi një grup lojtarësh që nuk do e çojnë dëm atë që kanë bërë që nga fillimi. Do mblidhemi, duke kërkuar edhe mbështetjen e të vjetërve, të ruajmë këtë punë që kemi bërë deri tani. Do ta kemi të vështirë, por do ia dalim.