Kreu i opozitës, Lulzim Basha, ka zhvilluar një takim me strukturat e Partisë Demokratike në Përmet, gjatë së cilit ka folur edhe për zgjedhjen e 30 qershorit, të cilat i konsideron farsë.
Basha i ka cilësuar këto zgjedhje nul teksa shprehet se ato ishin një masakër e Kushtetutës, e ligjit dhe standardeve.
“Farsa e 30 Qershorit është një grusht kriminal institucional i Edi Ramës për të pushtuar pushtetin vendor, për të shkatërruar KQZ-në dhe gjithë sistemin e administrimit të zgjedhjeve, përfshi Kolegjin Zgjedhor”, tha Basha.
Basha vijon më tej, duke paralajmëruar se përgjegjësit që kanë dhunuar Kushtetutën dhe ligjin në 30 Qershor, do të vihen para drejtësisë.
“Të gjithë ata që u bënë pjesë e këtij grushti kriminal institucional, me në krye ikonat e hajdutërisë dhe paligjshmërisë si Denarbibat që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale. Burgu i pret dhe nuk ka bandit e Bablok t’i shpëtojë”, u shpreh Basha.
Sipas tij, detyra kryesore e PD-së është t’i përgjigjet mesazhit të 30 Qershorit, refuzimit të Edi Ramës nga 85% e shqiptarëve dhe thirrjes së tyre për ndryshim.
