Pas një pritje disa javore, me një industri turizmi, që vlen sa një e katërta e prodhimit vjetor dhe të goditur shumë rëndë në 6 muajt e fundit, më në fund operatorët dhe klientët mund të shohin se cilat janë alternativat për këtë sezon veror në Shqipëri.
Broshura informuese, mbrojtje specifike të stafit, monitorim vizitorësh, inventar vetëm për covid19, dizinfektim konstant, 1.2 metër distancë nga tavolinat e ngrënies, 3 metra distancë kur je në ujë, 3.5 metra distancë ndërmjet cadrave dhe një certifikatë për t’u shpallur i sigurtë.
Këto janë vetëm disa nga masat që do të duhet të marrin pikat turistike si dhe duhet të zbatojnë të gjithë vizitorët nëse do të duan të bëjnë pushime. SCAN ka zbuluar draftin e hedhur për diskutim nga ministria e turizmit dhe ajo e shëndetësisë lidhur me mënyrën se si do të veprojmë në plazhet dhe pikat e tjera turistike gjatë sezonit veror 2020.
Draft dokumenti thekson se, nëse të pandryshuara, këto rregulla do të jenë të vlefshme vetëm kur qeveria të vendosë të eliminojë masat kufizuiese.
Ministritë e drejtuara nga Ogerta Manastirliu dhe Blendi Klosi po ndërtojnë një lloj “kushtetute” të të bërit plazh nën Covid19. Për më tepër sipas dokumentit, për sa i përket faktorit njerezor në ekuacionin e të bërit plazh këtë vit, theksohet se stafi duhet të jetë me veshje mbrojtëse dhe i kontrolluar me termometër në mënyrë periodike. Ndërkohë protokolli përcakton dhe krijimin e një regjistri të matjeve të temperaturës për secilin klient apo punonjës. Draft dokumenti shpjegon dhe higjenizimin e ambjentëve, pajisjeve dhe ushqimeve.
Për sa i përket plazheve dhe pishinave, protokolli parashikon distanca prej 2 metrash ndërmjet shezloneve si dhe prej 3.5 metrash mes cadrave ndërkohë që nuk harron të theksoj dhe distancën 3 metrash kur je në ujë.
Elementi më i ri për operatorët e turizmit do të jetë dhe Certifikata “Strukture e Kontrolluar”, një dokument që do t’i jepet bizneseve të cilat do të aplikojnë masat e këtij prokolli dhe për pasojë do të ofrojë një siguri më shumë për secilin shqiptar apo të huaj që do të vendosë të pushojë në vendin tonë. /SCAN
