Në Shqipëri për të tretën ditë radhazi, rastet e reja me COVID 19 janë në nivele relativisht të ulta, pas një rritje të ndjeshme javën e shkuar. Të dhënat e sotme të ministrisë së shëndetësisë flasin për 16 të prekur, nga të cilët 9 vetëm në kryeqytet, ku deri më tani janë 318 personat e infektuar që kur u rregjistrua rasti i parë.
Pesë raste të tjera i përkasin Krujës, vatra e cila shpërtheu javën që shkoi, duke bërë që deri më tani të numërohen 102 të prekur. Një tjetër rast është në Berat dhe 1 në Shkodër, zona e dytë për nga numri i të infektuarve, 108 deri sot në mesditë.
Në nivele të qëndrueshme vijon të mbetet situata në të dy spitale që trajtojnë të sëmurët me koronavirus. Në total janë 33 të shtruar, nga të cilët 2 në gjendje të rënduar dhe 10 të tjerë që po ashtu janë në terapi intensive. “Në shërbimin Infektiv aktualisht janë 27 të shtruar, 6 pacientë janë në terapi intensive. Në spitalin COVID 2 “Shefqet Ndroqi”, janë 6 pacientë të shtruar, 2 pacientë janë në terapi intensive në gjendje më të rënduar”, bëri të ditur Eugena Tomini e Institutit të Shëndetit Publik. Mes të shtruarve në spitalin Infektiv janë dhe 3 ushtarë shqiptarë të infektuar në Kosovë ku ata shërbejnë si pjesë e trupave shiptare në misionin e KFOR-it.
Të dhënat e sotme tregojnë se numri i personave të shëruar, ka qenë më i lartë se ai i rasteve të reja. Në total deri tani janë 455 qytetarë që kanë rezultuar negativë në dy teste radhazi, një shifër ndjeshëm më e lartë se ajo e të infektuarve aktivë, 281. /VOA
