Kërkesa e 28 deputetëve socialistë për shkarkimin e ish-ministrit Arben Malaj si anëtar i Këshillit Mbikëqyrës të Bankës së Shqipërisë është hequr nga rendi i ditës.
Kjo çështje, e cila ishte parashikuar të diskutohej në seancën e sotme parlamentare, do të shtyhet për në sesionin e ardhshme .
Kryetari i Kuvendit Gramoz Ruçi deklaroi se kompetencë për kërkesën për shkarkim nuk e kanë deputetët, por qeveria.
“Lidhur me këtë çështje njoftoj nismëtarët dhe kuvendin se kërkesa nga ana ime i është përcjellë Këshillit të Ministrave për kompetencë, pasi në zbatim të nenit 47/1 të ligjit për BSH Këshilli i Ministrave është ai që nis procedurën dhe nëse ai e nis vihen në lëvizje procedurat e tjera sipas rregullores së Kuvendit, komisionet dhe mandej seanca e Kuvendit.” u shpreh Ruci.
Deputetët e Partisë Socialiste kanë mbledhur 28 firma, me anë të të cilave kërkojnë që Arben Malaj të lirohet nga posti i tij.
Në letrën e firmosur nga 28 deputetët socialistë thuhet se Malaj ka kryer shkelje etike në daljet publike duke bërë deklarata politike, gjë të cilën nuk ia lejon posti i tij e Bankës së Shqipërisë.
