Ministri i Jashtëm në detyrë, Gent Cakaj njoftoi sot në një deklaratë për shtyp shkarkimin e 20 punonjësve të kësaj ministrie.
Gjatë fjalës së tij, Cakaj tha se vendosi të largojë punonjësit, pasi nuk përmbushnin kriteret, ndërsa nuk u kursye teksa tha se “Shqipëria nuk është e miqve, nuk është e kushërinjve politikë apo krushqve të klaneve politike”.
“Shqipëria nuk është e miqve, nuk është e kushërinjve politikë apo krushqve të klaneve politike të kujtdo qoftë, por është e të gjithëve, të dalluarve që punojnë me mendje, veprojnë me shpirt e shërbejnë me pasion me kapacitetin e plotë profesional dhe moral”, deklaratë kjo që në fakt rëndon direkt paraardhësin e tij, ish-ministrin Ditmir Bushati.
Duke u munduar të shfaqet i drejtë në sytë e publikut, Cakaj sapo thumboi dhe hodhi poshtë punën e deritanishme të Bushatit, ndërsa nuk dihet nëse kjo deklaratë ka qenë e mirëmenduar dhe e qëllimshme kundrejt ish-ministrit.
