Ministri i Jashtëm në detyrë, Gent Cakaj, një ditë më parë nisi pastrimin e shërbimit diplomatik nga të emëruarit e Ditmir Bushatit. Ai ndërmori një reformë rrënjësore në Ministrinë e Jashtme, por këto lëvizje duket se nuk janë mirëpritur nga deputetja demokrate, Rudina Hajdari. Gjatë një deklarate për media, ai njoftoi dje se ka ikur koha e punësimeve përmes miqësive dhe krushqive.
Cakaj deklaroi se fillimisht kjo reformë do të prekë 20 zyrtarë, duke shtuar se pjesa tjetër e punonjësve do të transferohen për të vepruar sipas nevojave reale të punës.
Sakaq, sot, në një seancë dëgjimore me ministrin e Jashtëm në detyrë, Gent Cakaj, deputetja demokrate Rudina Hajdari i cilësoi këto shkarkime si të paarsyeshme, duke cënuar të drejtën e punës.
Lidhur me këtë qëndrim, një përgjigje ka ardhur nga Cakaj, ku e ka argumentuar pse ka ardhur kjo lëvizje. “Nuk kemi të bëjmë me 20 lirime nga puna. Për mua është e papranueshme, ju duhet të jeni të lumtur që po fillon reforma në shërbimin diplomatik. Është përpjekje për të rritur performancën dhe një reformë substanciale”.
Po kështu, ministri Cakaj ka vlerësuar edhe punën e paraardhësit, duke cituar se Bushati ka bërë një punë të vlefshme, ndërsa shtoi se është i gatshëm që të thellojë reformat.