Prej ditësh tashmë Italia vijon të regjistrojë numrin më të madh të viktimave brenda 24 orëve.
Mediat italiane bëjnë me dije se 662 persona kanë ndërruar jetë orët e fundit, duke e çuar në 8,165 numrin total të viktimave.
Ndërkohë, brenda 24 orëve të fundit janë shënuar edhe 4,492 raste të reja, duke pësuar një rritje në krahasim me ditën e djeshme ku u regjistruan vetëm 3,492.
Deri më tani, në Itali regjistrohen 62,013 raste aktive me koronavirus. Ndërsa numri total i të prekurve me Covid-19 në këtë vend është 80,539. Prej të cilëve më shumë se 10 mijë pacientë janë shëruar.
Lombardia është vendi më i prekur në Itali nga ky virus, ku vetëm sot janë regjistruar 2,500 raste të reja.
“Për fat të keq, numrat nuk janë shumë të bukur, numri i të infektuarve është rritur pak a shumë në krahasim me linjën e ditëve të kaluara. Ne do të duhet të vlerësojmë nëse është një fakt i jashtëzakonshëm i përcaktuar nga ndonjë episod i veçantë ose nëse është një trend në rritje, i cili do të ishte pak i sikletshëm. Unë nuk e di nëse ka arritur kulmin, këto vlerësime varen nga teknikët, unë vetëm mund të të them që jam i shqetësuar personalisht”, tha presidenti i rajonit, Attilio Fontana, në komunikimin e përditshëm mbi përhapjen e Covid-19.
Si duket Italia tashmë do mbajë edhe vendin e parë në botë për numrin më të madh të personave të prekur me koronavirus. Kina e cila mban aktualisht vendin e parë numëron 81,285 raste, pra vetëm 700 e ca raste më shumë se Italia.
