Mbi 4 mijë të burgosur angazhohen çdo vit, për të shuar zjarret në shtetin e Kalifornisë në SHBA. Ata paguhen deri në 1 dollarë në orë, dhe kanë shanse të fitojnë më shumë ulje dënimi, apo mundësinë e lirimit të parakohshëm. Kjo praktikë ka nisur që në vitet 1940, kur autoritetet thirrën në ndihmë të burgosurit, për të zëvendësuar burrat që ishin angazhuar në Luftën e Dytë Botërore.
Për t’iu bashkuar skuadrës së zjarrfikësve, të burgosurit duhet të plotësojnë standarde të larta fizike, dhe të përfundojnë një kurs të detyrueshëm trajnimi. Ata përbëjnë gati një të tretën e personelit të zjarrfikësve që ka Kalifornia, punojnë mesatarisht 10 milionë orë çdo vit, dhe i kursejnë shtetit mbi 100 milionë dollarë. Një punë tipike në burgje, si ajo e pastrimit të dyshemeve, paguhet midis 8-95 cent në orë.
Megjithatë, pavarësisht përfitimeve, fikja e zjarreve është një punë tejet e rrezikshme. Vetëm në vitin 2017, humbën jetën 3 të burgosur. Më fatlumët janë të burgosurit e dënuar për krime më të lehta, që angazhohen në mirëmbajtjen e parqeve dhe pyllëzimin.
