Ish-kryeministri Sali Berisha sfidoi edhe njëherë Departamentin Amerikan të Shtetit, të dorëzojë në Gjykatën e Parisit provat kundër tij, për të legjitimuar shpalljen “non grata”, në të kundërt ai “kërcënoi” se nuk do të ndalet në misionin e tij.
Berisha nënvizoi ndër të tjera se do të vazhdojë misionin e tij, për të përmbysur regjimin dhe për sjellë PD në pushtet. Ai u bëri thirrje zyrtarëve amerikanë të dërgojnë në Gjykatën e Parisit çdo provë dhe fakt, për shpalljen e tij “non grata”.
“Ndaj dhe unë nisa betejën time po aq i vendosur, si 32 vjet më parë të bëj gjithçka për dinjitetin tim, në sallën e gjyqit dhe kam muaj dhe muaj që pres.
Asnjë fakt, asnjë dokument, asnjë provë. Për faktin e vetëm që nuk ekziston. U bëj thirrje zyrtarëve të DASH të çojnë në Paris çdo dokument që kanë. Unë marr çdo vendim ndaj vetes sime.
Jam mirënjohës ndaj miqve në Europë dhe SHBA-së për qëndrimet ndaj këtij vendimi. Do vazhdoj pathyeshëm misionin tim si besimtar i Zotit, dhe dinjitetit të njeriut. Beteja ime nuk do ndalet kurrë.
Ftoj zyrtarët e DASH të rishqyrtojnë vendimin e tyre, sepse arroganca dhe gabimi nuk janë virtyte të njerëzve të lirë. Unë u garantoj ju që do vazhdoj misionin tim bashkë me ju për të përmbysur narkoshtetin në Shqipëri”, u shpreh Berisha.
