Sot në Tiranë do të mbahet takimi i radhës në kuadër të “Open Balkan”. Presidenti i Serbisë Aleksandër Vuçiç, dhe kryeministri i Maqedonisë Zoran Zaev, do të vijnë në vendin tonë në kuadër të kësaj agjende. Zaev do të shoqërohet edhe nga zv/ministri i Financave maqedonas, i cili në ditët e para të janarit pritet të zëvendësojë Zaev në postin e kryeministrit. Punimet e këtij samiti do të zhvillohen në një hotel në qendër të Tiranës prej orës 10:00, ndërsa në orët e pasdites është paralajmëruar një konferencë për shtyp e liderëve të tre vendeve.
Samiti do vijojë sipas planit, pavarësisht thirrjeve të-ish kryeministrit për protesta. Berisha ka paralajmëruar protestë që do të startojë nga Partia Demokratike në orën 16:00, për të marshuar më pas drejt Kryeministrisë.
Ish-kryeministri do vërë në zbatim skenarin ku kërcënonte prej disa muajsh, ai i protestave. Berisha ka thirrur sot të gjithë mbështetësit e tij në një protestë kundër presidentit serb, i cili do të vijë në Tiranë.
Por më shumë se sa një protestë kundër Vuçiç, ajo pritet të jetë një manovër për të marrë me dhunë PD-në, dhe për të shkaktuar trazira.
Tubimi do nisë para PD-së dhe do vijojë te Kryeministria, por mësohet se turma do kthehet sërish në seli dhe këtë herë Berisha do tentojë të marrë karrigen e Lulzim Bashës. Të paktën këto janë planet që qarkullojnë në korridoret e politikës, dhe duket se kjo protestë do jetë një provë force për ish-kryeministrin. Ndërkohë sipas burimeve, policia është vënë e gjitha në gatishmëri, pasi ka sinjale se mund të ketë konfrontime.
