Një person i maskuar me kapuç në kokë ka hedhur lëndën plasëse 15 minuta para se të ndodhte shpërthimi dhe të plagosej Indrit Sadetini. Detaje të reja janë hedhur në dritë sa i takon atentatit me eksploziv që ndodhi një ditë më parë në Vlorë, ku mbeti i plagosur 34-vjeçari Indrit Sadetini.
Shpërthimi i fortë ndodhi dje rreth orës 15:00, në lagjen ’10 korriku’ në Vlorë, ku 34-vjeçari mbeti i plagosur rëndë dhe ka dëmtuar gjymtyrët e poshtme. Ai u soll me urgjencë për mjekim më të specializuar drejt Traumës në Tiranë, dhe për momentin gjendja e tij është e mirë.
Nga kamerat e sigurisë të bizneseve në afërsi të garazhit ku ndodhi shpërthimi, kanë pikasur atentatorin i cili 15 minuta para se të ndodhte shpërthimi, ka kaluar aty pranë me një kapuç në kokë dhe ka hedhur një pako duke e mbuluar me letër që të mos binte në sy. Atentatori ka qenë në distancë kur e ka shtypur butonin, ndërsa bomba ka qenë e lidhur me telefon.
Më pas ai është larguar i qetë në këmbë, ndërkohë që në momentin që Sadetini ka dalë nga garazhi dhe i ka kaluar afër, bomba e lidhur me celular është aktivizuar dhe ka shpërthyer duke i dëmtuar këmbët. Policia është duke bërë veprimet për gjetjen e autorit, dhe ka marrë në pyetje 6 persona.
Indrit Sadetinaj, nuk rezulton me precedent të mëparshëm penalë. Shkak për shpërthimin dyshohet konfliktet e mëparshme të 34-vjeçarit. Burime nga Policia e Vlorës bëjnë me dije se pista që po hetohet si motiv për atentatin është ajo e prishjeve të pazareve të drogës. Kjo nuk është hera e parë që ndaj Indrit Sadedinaj është bërë një atentat, pasi edhe katër vite më parë i është vendosur një sasi e madhe eksplozivi në makinë, e cila nuk ka shpërthyer, pasi e ka pikasur në kohë.