Shumë është aluduar në lidhje me krijimin e një vaksine ndaj koronavirusit. Disa kërkues kanë bërë me dije se po ecin me hapa të shpejtë, dhe se diçka mund të krijohet për një periudhë 3 mujore. Gjithsesi të gjitha këto janë në kuadrin e zërave, ende të pa konfirmuar.
Vetëm pak ditë pasi vendi konstatoi rastin e parë të koronavirusit, shkencëtarët në Brazil kanë zbërthyer sekuencat e ADN-së së virusit, për ta kuptuar më mirë atë dhe për të ndalur epideminë.
Puna investigative u krye në një laborator në Fakultetin e Mjekësisë në Universitetin e Sao Paolos, në bashkëpunim me Universitetin e Oksfordit. Shkencëtarët thonë se puna e mëparshme mbi virusin Zika, bëri që ekspertët të lëviznin me shpejtësi.
“Sa më shpejt të gjenerojmë një sekuencë të dy viruseve që përhapen me shpejtësi, aq më shpejt do të mund të sigurojmë informacione mbi këtë virus, dhe t’u japim përgjigje shërbimeve shëndetësore.
Ne ishim në gjendje të thonim që virusi ishte i transmetueshëm apo nëse po pëson mutacione mes njerëzve. Kjo është e rëndësishme për shërbimet shëndetësore, që të përgatiten për epideminë”, u shpreh Jaqueline de Jesus, shkencëtare në Universitetin e Sao Paolos.
Me hartën e ADN-së, shkencëtarët shpresojnë se do të mund të monitorojnë më mirë virusin dhe të përshpejtojnë hapat për gjetjen e vaksinës.
“Ne kemi studiuar epideminë e Zikës në katër vitet e fundit, për të gjetur mënyrën e hartimit të ADN-së së viruseve. Ajo që bëmë ishte zhvillimi i një teknologjie që ishte e shpejtë, me kosto të ulët dhe që mund të përdorej në shkallë të gjerë gjatë një epidemie”, është shprehur shkencëtarja Ester Sabino.
Në mbarë botën po merren masa drastike. Qeveria e Iranit ka lëshuar përkohësisht më shumë se 54.000 të burgosur, në përpjekje për të luftuar përhapjen e sëmundjes së koronavirusit. Kjo pasi burgjet ishin të tejmbushura. Zëdhënësi i gjyqësorit Gholamhossein Esmaili u tha gazetarëve se të burgosurve u është dhënë leje për të dalë nga katër muret e qelisë, vetëm pasi kanë rezultuar negativë nga testi i koronavirusit. Ai është shprehur se personat që janë dënuar me më shumë se 5 vite burg, dhe që rrjedhimisht kanë kryer krime më të rënda, nuk do të lirohen.
Italia e quajtur ndryshe edhe si vatra e koronavirusit në Europë, ka shënuar 79 viktima. Greqia ka mbyllur 28 shkolla, për të shmangur koronavirusin. Në Kinë së fundmi ka vdekur edhe një mjek, ndërsa rastet po shtohen shumë edhe në SHBA, ku Trump po merr masa të forta.
