Policia bashkë me forcat RENEA vijojnë aksionet për kapjen e urdhëruesve të rrëmbimit të shtetasit Jan Prenga.
Aksioni për kapjen e shtetasve M.B., G.D., dhe K.G., është shtrirë mëngjesin e sotëm në Shkodër. Në kërkim është shpallur edhe shtetasi e iniciale D.R. nga Vlora. Deri më tani në lidhje me rrëmbimin e Prengës janë arrestuar 5 persona, ndërsa dyshohet se trupi i tij të jetë varrosur diku në territorin e Shijakut.
Nga hetimet e deritanishme, dyshohet se pengmarrja e Jan Prengës është urdhëruar nga një grup i strukturuar kriminal, me bazë në Angli, dhe i përbërë kryesisht nga shqiptarë.
Burime zyrtare pranë Policisë së Shtetit konfirmojnë faktin se vëllai i Jan Prengës, që jeton në Angli, është kontaktuar nga një grup i fuqishëm që me kamionin e tij të nxjerrë nga Mbretëria e Bashkuar mbi 300 kg kokainë, që mbërrinte nga Amerika Latine.
Nga përgjimet rezulton se ai e ka marrë lëndën narkotike, por nuk e ka dorëzuar në destinacion. Për këtë, mendohet se grupi kriminal ka urdhëruar marrjen peng të vëllait të tij, Jan Prenga, i cili për shkak të torturave të shumta, ka gjetur vdekjen.
