Dy bashkëkryetarët e Komisionit të Posaçëm për Reformën Zgjedhore, Damian Gjiknuri dhe Rudina Hajdari, u takuan ditë më parë me dy të mandatuarit e opozitës për dakordësimin me mazhorancën për Reformën Zgjedhore, Oerd Bylykbashi dhe Petrit Vasili. Ndodhi një paqtim, ku u arrit dakordësia politike për Reformën Zgjedhore. I pyetur për këtë temë, Meta tha se “është hap pozitiv, por i pamjaftueshëm”.
“Eshtë hap pozitiv, sepse përfundimi i Reformës Zgjedhore është kërkesa e Bundestagut dhe gjithë procesit të kushtëzuar për hapjen e negociatave. Shpresoj të mos ketë surprizë tjetër rrugës.
Edhe sikur ky hap të jetë pozitiv, është fare pak edhe tepër vonë. Kërkohet një tryezë tjetër shumë e thellë, më e përgjegjshme për të plotësuar të gjitha detyrimet. Duhet të shkojë përtej Reformës Zgjedhore, sepse ajo nuk do të zgjidhë ndonjë gjë të jashtëzakonshme”, u shpreh Meta në një intervistë për “Abc News”.
