Në mbledhjen e parë të qeverisë, kryeministri Rama u ndal tek opozita. Ai premtoi se gjatë 4 viteve do duhet të behen shumë gjëra, e për rrjedhojë nuk kanë kohë për të humbur me opozitën. Kreu i qeverisë, Edi Rama, iu drejtua ministrave, se opozitës nuk do ti përgjigjen me formatin e vjetër.
“Ne nuk do t’i përgjigjemi me formatin e vjetër opozitës. Është një format që e ka derdhur me kohë kupën e durimit të publikut. Politika është e vetmja mundësi që njerëzit të bëjnë gjërat që të vetmuar si bëjnë dot. Kemi 4 vite kohë për të bërë gjëra që s’janë bërë kurrë më parë, ndaj s’kemi kohë për të humbur me opozitën ‘e lagu se lagu'”, tha ai.
Rama deklaroi se në marrëdhënien me Kuvendin, duhet treguar më shumë respekt. Ai tha shkurt dhe qartë se prania e tyre në komisionet parlamentare nuk duhet të vihet në diskutim, përveçse në raste ekstreme dhe duke u dakordësuar me kreun e grupit parlamentar.
“Qeveria buron nga Parlamenti dhe jo e kundërta. Prania juaj në komisionet parlamentare nuk duhet të vihet në diskutim, përveçse në raste ekstreme dhe duke u dakordësuar me kreun e grupit parlamentar. Vetëm për arsye pune, nuk duhet të vihet në diskutim prania juaj në hapjet e seancave të Kuvendit. Ky është minimumi etik në marrëdhëniet qeveri-parlament”.
