Kryeministri i Kosovës, Albin Kurti, ka folur ‘pa doreza’ mbrëmjen e sotme në “Ilva Now” , ku zbuloi se kishte kërkuar një takim me Ramën, Metën e Ruçin, për situatën aktuale të pandemisë, por ai nuk ka marrë asnjëherë një përgjigje. Ky takim ishte kërkuar në muajin mars, por asnjëherë nuk u mbajt, pasi Kurtit nuk i kthyen asnjëherë një përgjigje pozitive, duke e lënë në heshtje. Kurti nuk e ka lënë me kaq, duke zbardhur detajet e asaj çfarë kishte planikuar të ndodhte mes qeverisë së Kosovës dhe Shqipërisë. Tirana zyrtare ka heshtur, por Albin Kurti duket se kërkon ende të dijë se çfarë ka çaluar në këtë çështje.
“Nuk kanë heshtur të gjithë. A nuk duhej të pyesni ata, pse kanë heshtur? Thyeja njëherë atyre heshtjen dhe pastaj po flas për atë që ata thonë. Le të flasin njëherë ata, jemi dy shtete të një kombi apo jo?”, deklaroi Kurti gjatë intervistës në ‘Ilva Now’.
Ndër të tjera, kryeministri i Kosovës tha se në një letër dërguar homologut Edi Rama, për mbajtjen e një takimi të përbashkët në kohën e pandemisë, tha se nuk kishte marrë kurrë ndonjë përgjigje.
Lideri i VV-së tha se për këtë takim, i ka shkruar vetëm z. Rama dhe asnjë zyrtari tjetër. Madje për një takim të mundshëm kishte vënë në dijeni dhe Kryetaren e Kuvendit në Kosovë, Vjosa Osmani si dhe Presidentin Hashim Thaçi. Po kështu, ai tregoi më tej se nga mesi i muajit mars, i ka propozuar kryeministrit që të mbahet një takim me të, me presidentin Meta dhe kryetarin e Kuvendit, Gramoz Ruçi.
“Gjatë pandemisë, Ministritë e Shëndetësisë kanë komunikuar dhe kanë shkëmbyer përvoja dhe materiale. Diku nga mesi i muajit mars, i kam shkruar kryeministrit Rama dhe i kam thënë që duke qenë se nuk po mund ta bëjmë dot takimin e dy qeverive, i kam thënë që të mbajmë një takim Rama-Meta-Ruçi dhe unë, Osmani dhe Thaçi. Për të diskutuar për pandeminë, por nuk mora përgjigje asnjëherë për këtë gjë”, u shpreh më tej Kurti.
Pak ditë më parë, Albin Kurti injoroi Thaçin, duke munguar në takimin konsultativ për qeverinë e re. Në këtë takim të pranishëm ishin kryetari i LDK-së, Isa Mustafa, kryetari i PDK-së, Kadri Veseli, kryetari i AAK-së, Ramush Haradinaj, ai i Nisma-së, Fatmir Limaj, përfaqësues të AKR-së dhe komuniteteve jo shumicë.
Marrëdheniet mes Ramës dhe Kurtit kanë qenë të agravuara. Më herët, kreu i qeverisë Edi Rama është prononcuar në lidhje me relatat që ka me kryeministrin e Kosovës, Albin Kurti, politikan me të cilin dikur Rama ndante një raport mjaft të afërt.
Jo vetëm që nuk ndan më një relatë të ngrohtë me Albin Kurtin, por është shprehur se ndryshe prej tij, ai nuk bën politikë me marrëdhëniet dhe bisedat personale.
