Kryeministri Rama i cili ka patur përballje të forta me presidentin Ilir Meta, ka çuditur me deklaratën e tij në Kuvend, ndërsa u shpreh se ai e ka votuar dhe nuk është penduar.
Në fjalimin e gjatë që vërshoi me një lum akuzash ndaj tij, Rama duket sikur i zbuti tonet, duke konfirmuar publikisht se ai nuk ishte penduar për asnjë arsye ndaj zgjedhjes së Metës.
“Unë e kam votuar ilir Metën si president. Gjithkush në këtë sallë ishte njësoj si unë këtu, shumëkush më ka kritikuar, në rrjetet sociale më zhdëpin për zgjedhjen e tij dhe jo pak më kanë mallkuar. Sa shfaqet Ilir me paudhësitë e veta më përvishen mua të gjithë.
Nuk jam penduar, po të kthehesha pas në kohë do bëja prapë të njëjtën gjë. Ilir Meta u zgjodh me votat e tij si president, dhe votat tona mund ta pengonin.
A e kam imagjinuar unë se Iliri do e kthente humbjen e tij të vetëkontrollit nga një fenomen sporadik në një mjet sistematik për të coroditur sistemin kushtetues, dhe për të udhëhequr një plan të orkestruar me Saliun në dëm te vendit. Jo, këtë nuk e kisha imagjinuar.
Kjo ka kaluar përtej cdo imagjinate, dhe nuk mund të tolerohet. Meta e ka humbur të drejtën të qëndrojë në zyrën e presidentit me pëlqimin tonë. Një president që argumenton një marrëzi antikushtetuese si anulimi i zgjedhjeve në mes të fushatës, dhe kur e pyesin përgjigjet ma përsërisni se nuk dëgjoj mirë, këto kohët e fundit kam qenë i sëmurë, është sidoqoftë njëri për të ardhur keq. Duke shprehur keqardhjen time si njeri dhe si kundërshtar, aleat që dikush që nuk ka bërë vetëm gjëra të këqija, i uroj sot ta lexojë me qetësi rezolutën nëse nuk i kupton qartë fjalët që thuhen sot nga ky Kuvend”, tha Rama.
