Drejtori i Përgjithshëm i Policisë së Shtetit, Ardi Veliu, është larguar dje nga detyra. Vendimi në fjalë ka ardhur pas afatit 100 ditor që kryeministri Edi Rama kishte caktuar ndaj tij, për punën e dobët të Policisë së Shtetit. Vetë kreu i qeverisë Edi Rama ndau me ndjekësit në rrjetet sociale, letrën e dorëheqjes së Ardi Veliut.
Mes të tjerash Rama vlerëson Veliun për kontributin e dhënë, ndërsa lë të hapur mundësinë për emërimin e tij në një tjetër post, pasi sipas kryeministrit, Veliu ka ende për t’i dhënë shtetit.
“Me konsideratën më të lartë për ndershmërinë, profesionalizmin dhe përkushtimin e posaçëm të Drejtorit të Përgjithshëm të Policisë së Shtetit, Ardi Veliu, dhe me bindjen se ai ka akoma shumë për t’i dhënë shtetit në detyra të tjera, e falenderoj nga zemra për kontributin e vyer”, shkruan Rama bashkëngjitur letrës, të cilën e ka postuar në Twitter.
Me konsideratën më të lartë për ndershmërinë, profesionalizmin dhe përkushtimin e posaçëm të Drejtorit të Përgjithshëm të Policisë së Shtetit, Ardi Veliu, dhe me bindjen se ai ka akoma shumë për t’i dhënë shtetit në detyra të tjera, e falenderoj nga zemra për kontributin e vyer. pic.twitter.com/C7dCbHvulC
— Edi Rama (@ediramaal) October 5, 2021
Largimi i Ardi Veliut ishte paralajmëruar nga kryeministri Edi Rama pak ditë më parë, i cili i gjendur nën presionin e opozitës dhe qytetarëve, i dha një ultimatum Veliut. Në një takim me përfaqësues të Policisë së Shtetit, Rama la 100 ditë afat për të riorganizuar të gjithë strukturën e organizatës dhe vendosur prioritete të qarta.
Kryeministri kërkoi që punonjësit e policisë të përfshirë në afera korruptive, ryshfeti dhe ata oficerë që “luajnë me dy porta”, të largohen nga radhët e uniformave blu, dhe të dalin përpara përgjegjësisë penale.
“Keni 110 ditë kohë për ta rivënë të gjithë trupën në angazhim maksimal nga i pari tek i fundit. Asnjë ditë më shumë. Që qytetarët të marrin frymë shumë të lehtësuar, duke e parë Policinë e Shtetit në një nivel tjetër. Asnjë shkencë, asnjë shpikje, asnjë luftë me të panjohur, thjesht dhe vetëm gjërat që i dini, gjërat që njerëzit duan si themelin e marrëdhënies me shtetin. Në çdo qark në 100 ditë duhet të jepen shembuj të qartë, nuk mund të ketë komisarë që luajnë me dy porta dhe ju nuk e keni fare problem as t’i kapni. Ky është një objekt i palëvizshëm në çdo qark”, deklaroi kryeministri Edi Rama.
