Mesditën e sotme, kreu i qeverisë Edi Rama ka mbledhur në Kryeministri krerët e Bashkive, për të diskutuar mbi performancën e sektorit të ujësjellës-kanalizimeve. Kryeministri Rama ka qenë i drejtpërdrejt me kryebashkiakët kur i tha që ujësjellësit në të gjithë Shqipërinë janë një piramidë që gllabërojnë para.
“Hyjnë fondet e buxhetit të shtetit dhe fondet e akorduara nga partnerët që janë kredi që duhen paguar. Shuma qeveria shqiptare ka vënë në dispozicion me këto dy burime janë praktikisht 1.2 miliard euro. A jeni ju në dijeni të performacës së ujësjellës-kanalizime në Bashkitë tuaja, të shërbimeve që këto ndërmarrje ofrojnë për qytetarët. Ju i keni parë raportet që pastaj ia jepni qeverisë si vetëdeklarime për performancën. Sa fonde keni alokuar ju nga buxheti juaj për këtë? Ne rrisim investimet, ju rrisni humbjet. 79% janë humbjet, një piramidë që merr para. Si mund të vazhdojë kështu kjo histori?”, tha Rama.
Sakaq, Ministrja e Infrastrukturës, Belinda Balluku, u shpreh se ka një keqmenaxhim dhe se performanca e këtij sektori është shumë e dobët. “Kemi marrë në analizë të thellë sektorin e ujit, janë prekur të gjitha zonat, urbane dhe rurale. Kam raportuar te kryeministri performancën e këtij sektori që le për të dëshiruar, dhe nuk do përjashtoja asnjë ndërmarrje të ujësjellësit. Duke hequr mënjanë Korçën dhe Pogradecin, kemi identifikuar që pavarësisht procesit të agregimit para disa vitesh, sërish performanca e ujësjellës kanalizimeve në të gjitha Bashkitë, mbetet e dobët. Të gjitha shifrat janë jo në përputhje me shifrat e investimeve në ndërmarrjet tuaja. 39% e ujësjellës kanalizime furnizojnë më pak se 10%, 28% kanë një nivel të humbjeve mbi 67% dhe një fenomen shqetësues është që në ato ujësjellës ku ne investojmë, kemi patur edhe rritje madje të humbjeve. Ndërkohë që investohet, rritet përqindja e ujit të papaguar dhe kjo është ajo sasi që vidhet në rrjet ose që humb për shkaqe teknike. Duke u përballur me këtë fakt na lind e drejta të mendojmë që ka keqmenaxhim nga drejtuesit e ndërmarrjeve të ujësjellës kanalizimeve”, u shpreh Balluku.
