Kryeministri Edi Rama deklaroi në mbledhjen e Këshillit Politik se marrëveshja e 5 qershorit nuk do të ndryshojë, teksa theksoi se është kërkuar hapja e listave për të arritur dakordësinë e opozitës parlamentare.
“Ne nuk ndryshojmë as sistem, as zona zgjedhore. E vetmja gjë është që po hapim listat. Edhe për hapjen e listave hajdeni ulemi nëse keni ndonjë mendim se si të garantojmë kuotën gjinore sa më mirë.
Nuk ndalojmë koalicionet por formë grupimi që të mundësojë hapjen e listave dhe të mos ndërlikojë administrimin.
Marrëveshja duhet miratuar, për t’u miratuar duhen votat në kuvend që ne si mazhorancë nuk i kemi. Në bisedimet me opozitën parlamentare kemi dakordësuar për hapjen e listave. Ajo çka kërkojmë është hajdeni ulemi dhe me sa më shumë dakordësi të reflektojmë në kod këtë sanksionim të hapjes së listave që vjen nga ndryshimi kushtetutës.
Por në një koalicion siç i bën gjithë Evropa dhe jo si modeli ynë i deritanishem që s’e ka askush. Pra nuk u ndalon njeri të bëni aleancat tuaja.
Korrektimi në kod i përket vetëm pjesës së hapjes së listave dhe nuk cenon përmbajtjen e dokumentit”, tha Rama, shkruan “abcnews.al”.
