Turistët që po vizitojnë Shqipërinë po tregohen më dorëlëshuar, ndërsa vendi po përfiton gjithnjë e më shumë nga ky sektor. Gjatë tre muajve të parë të vitit, 1.62 milionë turistë të huaj shpenzuan në total 874.36 milionë euro, me një rritje prej afro 11% krahasuar me të njëjtën periudhë të vitit 2024. Në mesatare, një turist shpenzoi 537 euro për person, nga 513 euro një vit më parë.
Në të njëjtën kohë, janë rritur edhe shpenzimet e shqiptarëve jashtë vendit. Gjatë muajve janar, shkurt dhe mars, shqiptarët shpenzuan jashtë 579 milionë euro, me një rritje po ashtu prej 11% në krahasim me një vit më parë. Mesatarisht, një shqiptar shpenzoi 307 euro për udhëtimet e tij.
Bilanci i turizmit për këtë tremujor mbetet pozitiv, me një diferencë prej 295.32 milionë euro midis të ardhurave nga turistët e huaj dhe shpenzimeve të shqiptarëve jashtë vendit, duke shënuar nivelin më të lartë ndonjëherë për këtë periudhë.
Shqipëria vijon të tërheqë kryesisht turistë nga Europa, por rritet ndjeshëm edhe numri i vizitorëve nga Amerika, Afrika, Azia dhe Lindja e Mesme. Ndërkohë, shqiptarët zgjedhin të udhëtojnë kryesisht në vendet europiane, por gjithnjë e më shumë po shtrijnë udhëtimet edhe më larg.
