Kryeministri Edi Rama së bashku me Ministren e Shëndetësisë, Ogerta Manastirliu inspektoi pasditen e sotme, 4 janar, Qendren e Parë të Vaksinimit anti-Covid 19 e cila është në instalim e sipër në stadiumin ”Air Albania”.
Kreu i qeverisë u shpreh se synimi është të që nisë vaksinimi më parë se sa afati kontraktual me Pfizer për javën e tretë të janarit.
Shqipëria pritet të nisë së shpejti vaksinimin e bluzave të bardha, mësuesit, punonjësit e policisë dhe moshën e tretë mbi 75 vjeç.
“Në instalim e sipër Qendra e Parë e Vaksinimit anti-Covid19 në Air Albania Stadium. Së shpejti nisim vaksinimin e bluzave të bardha, që synojmë ta fillojmë më parë se sa afati kontraktual me Pfizer për javën e tretë të janarit, përmes punës intensive diplomatike në shumë drejtime,”- shkruan Rama krah videos në rrjetin social, Facebook.
Ndërkohë, ministrja Manastirliu u shpreh se në të gjithë stadiumin do të jenë 60 stacione vaksinimi, ku parashikohet që gjatë 1 ore të vaksinohen 60 persona.
Personat që do të shkojnë për të marrë vaksinën do të ulen fillimisht në poltronet e paravaksinimit ku do të plotësojnë anamnezën, ndërsa pas vaksinimit do të duhet të qëndrojnë edhe 30 minuta të tjera në qendrën e vaksinimit.
