Kryeministri Edi Rama tha sot se Kuvendi do të votojë me shumicë të gjerë marrëveshjen e 5 Qershorit. Në fjalën e tij në Kuvend, Rama ka falenderuar deputetët e opozitës në Kuvend, të cilët sipas tij, do të firmosin sot marrëveshjen.
Kreu i qeverisë deklaroi sot se Kuvendi nuk po e shfrytëzon rastin që PD dhe LSI nuk ndodhen në sallë, por përkundrazi, i përfshiu ata në procesin e reformës zgjedhore.
Rama shtoi se ai vetë do ta votojë marrëveshjen e 5 Qershorit me mendje, por jo me zemër.
“Do të them disa fjalë për votimin që kthen në ligj marrëveshjen e 5 Qershorit, mes PS-së dhe PD-së dhe aleatëve të saj.
Dua ta filloj me një falenderim për grupet e opozitës parlamentare, kryetarët e grupeve dhe zonjën Hajdari, posaçërisht duke qenë se ka luajtur rolin e saj dhe i ka rezistuar edhe shpalljes si tradhtare nga ana juaj.
Ka kontribuar bashkë me ju për nënshkrimin e marrëveshjes mes nesh dhe jush, që i hap rrugë një votimi sot me një shumicë më shumë sesa aritmetike.
Natyrisht që do të ishte mirë që edhe Myslymi, zoti Murrizi, edhe të tjerë bashkë me të mos e firmosnin me rezervë marrëveshjen dhe ta votonin, duke dhënë një mesazh shumë të qartë për të gjithë shqiptarët pa dallim edhe për ata, që përfaqësuesit i kanë jashtë parlamentit. Se ne jemi të vetëdijshëm për realitetin politik. Unë nuk e votoj me zemër, por e votoj me mendje marrëveshjen e 5 qershorit”, tha ai.
