Ministri i Jashtë grek Nikos Dendias në fillim të punës së qeverisë së re në shtetin fqinj ka kritikuar në distancë Kryeministrin Rama.
“Më bën përshtypje të jashtëzakonshme që kryeministri Rama nuk ka qëndrime pro greke. Më bën përshtypje sepse zoti Rama është çerek grek, gjyshen e tij Anagnosti e njihja ne Korfuz. Duhet të mbrojmë dhe të drejtat tona, minoritetin grek në vendin fqinj por nuk mund të lejojmë që vendi të bëhet terren për kërcënime.”
I pyetur mbi këtë gjë gjatë konferencës me gazetarë, kryeministri Rama u shpreh se nuk ka asnjë lidhje me Greqinë. Ndër të tjera Rama u shpreh i prerë me qëndrimin për ortodoksët shqiptarë. Si edhe shtoi se minoriteti grek në vendin tonë nuk është një terren për kërcënime. Përkundrazi, ata janë një pasuri për vendin.
“Nuk kam asnjë qelizë greke, nuk e kam pasur këtë prurje. Ndërkohë që kam ca rrjedha të tjera, ashtu siç kam rrjedha të brendshme nga Shkodra, Mirdita, Berati, Vuno e Vlorë. Për mua ortodoksët shqiptarë janë shqiptarë, dhe ortodoksët grekët janë grekë. Në pikëpamje fetare kam edhe rrjedhë katolike e ortodokse. Dua të nënvizoj shumë qartë që ortodoksët shqiptarë janë shqiptarë. E kemi të ndarë këtë pjesë, Greqia e ka bashkë. Por, nëse për ta çdo grekë është ortodoks. Për mua çdo ortodoks shqiptarë është shqiptarë.
Për sa i përket marrëdhënieve, dëshira është të kemi sa më të mira të mundshme. Kemi bërë negociata për çështje të shkuara. Me qeverinë e re duam të kemi vazhdim të dialogut, sepse marrëdhëniet tona nuk mund të varen nga origjina politike e partisë së vendit tjetër. Duhet të vëmë pika mbi i mbi disa çështje të keqkuptuara për minoritetin grek në Shqipëri. Ky i fundit është i dëshiruar në vendin tonë, shihet si pjesë integrale e padyshimtë e jona dhe si pasuri. Asnjëherë nuk do të ketë tendecë negative ndaj minoritetit grek.”
