Protesta e shtatë kombëtare e organizuar nga opozita e bashkuar është shoqëruar me tensione dhe përdorim masiv të mjeteve piroteknike. Ditën e sotme policia raporton se për përplasjen me policinë janë ndaluar 42 protestues. Partia Demokratike ka reaguar menjëherë më anë të nënkryetarit, Edi Paloka.
Paloka është shprehur se Edi Rama dhe Sandër Lleshaj janë sot në panik dhe se po terrorizojnë qytetarët. Ai shtoi më tej se Shqipëria është i vetmi vend i NATO-s me të burgosur politikë. Paloka kërcënoi se të gjithë ata drejtues që zbatojnë urdhra kriminalë do të dalin para ligjit.
“Shqipëria është sot vendi i vetëm anëtar i NATO-s me të burgosur politik, me persona që përndiqen vetëm pse janë kundërshtarë politikë, vetëm pse dalin kundër Ramës, kryeministrit të zgjedhur nga krimi i organizuar. Opozita dënon me forcë ndalimin e protestuesve. Janë me dhjetëra persona të ndaluar. Rama dhe Lleshaj kanë qëllim që të terrorizojnë qytetarët.
Që prej 16 shkurti, Edi Rama është një kufomë politike. Është fakt se shumica e 500 qytetarëve të ndaluar deri më sot janë të ndaluar nga policia, janë sot të lirë sepse kanë qenë të pafajshëm, kanë qenë të burgosur politikë dhe në të drejtën e tyre. Rama ka urdhëruar policët, urdhëron prokurorët deri te gjykatës militant si Arben Micko.
Ka edhe njerëz që janë rrëmbyer me dhunë, pa qenë fare në protestë. Sot kemi polici kriminale. Sot kemi dy polici, atë të ndershme dhe atë të krimit. Ata urdhëruan me forcë që të largohet Bardh Spahia, në një situatë aspak të këndshme. Çdo prokuror dhe gjykatës do përgjigjet një ditë. Ata do të marrin fund bashkë me Edi Ramën”, tha Paloka.
