Kryeministri Rama akuzoi sot nga foltorja e Kuvendit opozitën, se në kohën kur ata qeverisnin, mbahej gishti në hundë nga era e keqe. Por duket se kjo nuk është kapërdirë lehtë nga kryedemokrati Basha, i cili ia ka kthyer me të njëjtën monedhë. Basha akuzoi Ramën se për 11 vite, la të hapur një gropë në qendër të Tiranës, që kundërmonte erë të keqe.
“Do e marr fjalën pas parafolësit, sikurse kërkuesit të interpelancës i lind e drejta për replikë. Opozita s’ka të lëshojë asnjë nga këto dy të drejta në këtë foltore. Se çfarë katastrofe ka qenë keqadministrimi dhe korrupsioni me të ashtuquajturin rindërtim dhe pandeminë, shqiptarët e njohin në lëkurën e tyre.
Pavarësisht se janë harxhuar shumë para dhe kohë televizive për gënjeshtra dhe reklamë, disa fakte nuk shlyen dot, kur njerëzit çohen në mëngjes në çadra apo në banesat e familjarëve apo banesa me qira. Janë akoma larg pallateve të rrafshuara në Kombinat, ku zona që do të shpronësohej nuk është shpronësuar. Hajdutët e fatkeqësisë kanë bërë gati planin ku aty ku rrafshuan pallatet, dhe iu kanë zhvatur lekët shqiptarëve.
Kështu që nëse ka diçka për të mbajtur duart në hundë, është era e kërmës që qelb këtë sallë. E regjimit të instaluar duke blerë vota, duke shkrirë në një shtetin me partinë, dhe të parin që krekoset mbi këtë pleh që nuk ka lidhje me demokracinë dhe aspiratat e shqiptarëve për një jetë më të mirë. Ka lidhje me babëzinë për pushtet, për para që iu ka zënë sytë.
Kjo babëzi nuk ju pengoi që ndërkohë që COVID ju ka penguar që të ngrini shtëpinë, të ngrinit godinën 50 katëshe me bosët e kokainës. Ti duhet ta dish se kush bos kokaine ka rezervuar një kat në atë godinë.
Mund të shpiket ndonjë parfum si gropa e Ajdin Sejdisë. Ti që na flet për të bukurën, për shijen për aromën e PD-së. Shkrimtari më i madh e ka quajtur PD-në, partia e shijes. Ti që ankohesh kur nuk ke gjetur gjendjen sanitare që të akuzon pasardhësi yt. Gropën e mbylla unë dhe shndërrova në lulishte. Kurse paraardhësi yt do të bëjë dhe aty kulla, nga paratë e drogës”, përfundoi Basha.
Sakaq, Rama i kërkoi Bashës që të flasë me argumente dhe jo akuza boshe. Ai i kërkoi të mos ‘bëjë të fortin’ në Kuvend, duke i thënë edhe me ironi “a të keqen vëllai, të kam xhanë”.
“Arsyeja pse ti nuk fiton, nuk janë as kriminelët, as bosat, por ti, sepse me këtë mënyrë të foluri nuk të beson askush. Gënje veten tënde, por ndrysho sa nuk është vonë. Unë jam këtu për të respektuar këtë institucion, këtë përgjegjësi që kemi marrë bashkarisht, për të të respektuar dhe ty bashkë me partinë tënde, por që kjo është partia më e bukur e lindjes, më jep një pushim.
Ti mund të jesh mister lindja sot, por lind më në fund dhe mos vazhdo të flasësh sikur je akoma në pelenat e mjekut, bëhu burrë e mos hajde këtu me shpije, por argumenta.
Nuk e di ku i sheh ti ata që gdhihen në çadra, se ti ngrihesh vonë dhe kur ngrihesh ti, ata janë në punë. Në çadra, qysh nga dita e parë e sot, janë rreth 400 familje, por siç ke gërmuar dhe më përpara, shko prap dhe gërmo nëse te ata në çadra ka një familje që nuk vazhdon të marrë bonusin e qirasë.
Ata rrinë në çadra, se ndryshe nga ty punojnë, e nxjerrin bukën me punë e tyre jo të tjerëve dhe ndryshe nga ty, nuk i ka mbajtur njeri në krah për vite të tëra. Ti kur i qan hallet të tjerëve, e sidomos popullit, mban një erë hipokrizie or ti Lulëzim, sa edhe këta që janë këtu që janë me ty, aq shumë e kanë të vështirë ta përballojnë, sa edhe këta aq shumë e kanë gënjyer veten që je lider i tyre. Sa tani pyesin, a je ti apo nuk je ti. E ke një mundësi t’i shmangësh këto budallaqe, e fokusohu te faktet e argumentet. Aman na e kurse këtë të fortin, mos e përsërit më sa të provosh se je në gjendje të rrish pranë 50 demokratëve në të njëjtën kohë, a të keqen vëllai se të kam xhanë”, tha Rama.
