Teksa afati kushtetues po afron, Kosova vijon të mbetet në një klimë pasigurie politike sa i përket formimit të institucioneve të reja.
Pavarësisht diskutimeve të zhvilluara deri më tani, ende nuk është arritur asnjë marrëveshje, ndërsa seanca për konstituimin e Kuvendit pritet të thirret në fillim të muajit gusht.
Sipas njohësve të çështjeve politike, pezullimi i bisedimeve nga Lidhja Demokratike e Kosovës (LDK), si dhe përplasjet e brendshme në këtë parti, kanë shtuar pasiguritë për sigurimin e shumicës së nevojshme për zgjedhjen e presidentit të ri.
Analisti Sadik Zeqiri vlerëson se në këtë fazë roli i Partisë Demokratike të Kosovës (PDK) mund të jetë vendimtar. Sipas tij, pas zhvillimeve të fundit në LDK ekzistojnë dilema nëse të 18 deputetët e kësaj partie do të mbështesin kandidatin për president.
“Nëse nuk ka bisedime me PDK-në, atëherë vendi do të shkojë në zgjedhje. LDK nuk i ka të garantuara 18 votat për kandidatin për president”, deklaroi Zeqiri.
Në të njëjtën linjë u shpreh edhe analistja Fatime Hajdari, e cila tha se zhvillimet e fundit në LDK e kanë thelluar më tej krizën politike në vend.
“LDK nuk ka pasur siguri të brendshme në kontrollimin e votës, se sa vota i ka në një bashkëpunim politik. Ata duhet të kenë qartësi. Këto parti politike duhet të kenë përgjegjësi dhe obligim për të bashkëpunuar me njëra-tjetrën”, u shpreh Hajdari.
Ndërkohë, ushtruesja e detyrës së presidentes, Albulena Haxhiu, deklaroi të premten se seanca konstituive e Kuvendit do të thirret në fillim të muajit gusht.
Nga Qeveria e Kosovës thanë se shpresojnë që opozita nuk do të bllokojë procesin dhe se vendi nuk do të detyrohet të shkojë në zgjedhje të reja.
Pas takimit të fundit, Partia Demokratike e Kosovës ka bërë të ditur se do të mbetet në opozitë, ndërsa LDK ka pezulluar bisedimet, duke shtuar pasiguritë mbi mënyrën se si do të ecë procesi i formimit të institucioneve të reja.
