Dje gjatë një konference për media, kryeministri Edi Rama u shpreh se qeveria në mandatin e saj të tretë qeverisës, ka vendosur që të dëgjojë më shumë zërin e qytetarëve për çështjet me rëndësi strategjike për vendin, ekonominë dhe shoqërinë. Kjo do të bëhet përmes nismës “Këshillimi Kombëtar për Shqipërinë”, që sipas kryeministrit Edi Rama do të jetë një kuvendim popullor me shqiptarët brenda dhe jashtë vendit, për të dhënë mendimin e tyre për çështjet me rëndësi.
Rama foli edhe për hetimin e gjyqtarëve. Në pyetësor do të përfshihet edhe pyetja nëse shqiptarët duan që gjyqtarët dhe prokurorët që dalin nga Vettingu që kanë probleme, të shkarkohen direkt, pa vonesa. Rama solli edhe shembullin e një gjyqtare që pronën ku do ndërtohej Teatri i Kukullave, e ka kaluar në pronë të një privati, një javë para se të shkarkohej zyrtarisht nga Vettingu. Kryeministri i ka bërë thirrje SPAK-ut që këtë gjyqtare dhe të tjerë që janë shkarkuar se kanë pasur probleme me pasurinë, të thirren urgjentisht dhe të japin sqarime.
“Problematika tjetër është që nga njëra anë ne mendojmë se gjyqtarët dhe prokurorët që nuk e kanë kaluar Vettingun duhet të pezullohen në vend. Kemi pasur disa raste flagrante në kohë, që nga raste të rishikimit të dënimit. Po ju jap një rast, angazhohet qeveria e Shqipërisë për të ndërtuar qendrën e fëmijëve me një teatër të ri kukullash, përcaktojmë vendin dhe marrim të dhënat që është e jona, pra e shtetit, e publikut dhe bëjmë projekt. Por çfarë ndodh në momentin që ne duam të fillojmë punë, del se gjyqtarja ka bërë siguri padie një personi që në të shkuarën i ka humbur të gjitha. Tani dhe rasti është që gjyqtarja jep këtë vendim vetëm një javë para se të largohet nga Vettingu”, tha ai.
Kryeministri Edi Rama, u shpreh, se gjykatësja duhet që të thirret nga SPAK dhe duhet të jap shpjegime. Ai theksoi se edhe gjyqtarët e tjerë që nuk kanë kaluar Vettingun, duhet që të shkojnë para gjyqit. “Kjo gjykatëse duhet të thirret urgjentisht nga SPAK, sot, jo nesër! Siç duhen të thirren të gjithë ata që nuk e kanë kaluar Vettingun, pasi kanë pasur mospërputhje të pasurisë. Dhe këta njerëz duhet të shkojnë para gjyqit, sepse kanë grabitur njerëzit duke shitur të drejtat”, u shpreh Rama.
