Kreu i PD-së, Lulzim Basha, në një konferencë për mediat u ndal tek kërkesa e opozitës për të ngritur tre komisione hetimore. Ai tha se ‘pakica në pushtet’ po përpiqet që të sabotojë ngritjen e tre komisioneve hetimore, të kërkuara nga Partia Demokratike, që në nisje të aksionit të saj politik.
E teksa deri më tani është ngritur vetëm ai për zgjedhjet, Basha shprehet se edhe komisionet hetimore për inceneratorët dhe për çështjen Becchetti, nuk do të pengohen. Kryedemokrati Basha, teksa u ndal tek deklaratat e kryeministrit Rama, deklaroi se është gënjeshtër fakti që ka mohuar vendimin për Becchetti-n. Sipas Bashës, vendimi është publik dhe jo konfidencial siç ka pretenduar Rama, ndërsa shtoi para gazetarëve se kryeministri ka përdorur shtetin në një luftë personale që do t’u kushtojë shqiptarëve 120 milionë euro.
“Në aksionin e saj politik në nisje të Parlamentit, ndër të tjera Partia Demokratike ka kërkuar ngritjen e tre komisioneve hetimore, një komision hetimor për masakrën zgjedhore, një komision hetimor për inceneratorët e mafies dhe një komision hetimor për çështjen Becchetti. Siç e keni parë, Komisioni Hetimor për masakrën zgjedhore është ngritur, dhe pavarësisht përpjekjeve për ta sabotuar atë, vijon dhe ne do ta çojmë deri në fund zbardhjen e asaj që ndodhi me votën e shqiptarëve, me qëllim krijimin e të gjitha kushteve të domosdoshme për të penguar përsëritjen e lidhjes të shtetit, krimit dhe oligarkisë si një nyje në fytin e demokracisë shqiptare.
Ngritja e dy komisioneve të tjera, për inceneratorët dhe Becchettin, po vonohen momentalisht nga pakica në pushtet, me pretekste sa naive, po aq acaruese për qytetarët që e dinë mirë se çfarë fshihet pas tyre. Megjithatë, mund të vonojnë ngritjen e tyre, por nuk e pengojnë dot atë”, tha Basha.
“E nëse për mafien e inceneratorëve po kërkojnë riformulim të kërkesës tonë, në përpjekje për ta kthyer atë që duhet të jetë një komision hetimor, në një pseudo-grup pune për mjedisin, ndërkohë Rama shantazhoi jo më larg se dje krerët e bashkive për t’i çuar mbetjet te inceneratorët me pronarë offshore, për të furnizuar me paratë e qytetarëve llogaritë bankare në parajsat fiskale. Për komisionin Beccheti, Edi Rama u tregua i prerë, duke na thënë se duhet ta harrojmë ngritjen e tij, sepse sipas Edi Ramës, vendimi është i “mbuluar nga konfidencialiteti” dhe publikimi i tij dëmton interesat e Shqipërisë. Kaq sekret është saqë me një smartphone, me një wi-fi, klikoni linkun dhe ju del vendimi që përcakton qartë se për shkak të luftës personale të Ramës me Bechetti-n ne shqiptarët do duhet t’i paguajmë 120 milionë euro”, tha Basha.
