Vajza e liderit të Dhjetorit, Azem Hajdari, duket se ende nuk është e bindur nëse duhet të bashkohet me vendimin e PD-së, apo do të mbajë mandatin e deputetit. Nëse ajo nuk lë mandatin, nga Partia Demokratike ka ardhur paralajmërimi se do të ndiqet i njëjti standard me Myslim Murrizin, i cili u përjashtua nga partia, pasi qëndroi në Parlament.
Demokratja Rudina Hajdari sot është shfaqur në krah të ambasadorit të Bashkimit Evropian në Tiranë, Luigi Soreca. E pyetur nga mediat, ajo ka zgjedhur që të heshtë në këtë drejtim, duke i lënë sërish kohë vetes.
Rudina ka ‘ngacmuar’ përmes statusit të radhës, ku edhe këtë herë nuk kanë munguar kritikat nga ana e qytetarëve.
Ja se çfarë ka shkruar vajza e Azem Hajdarit: “Me rastin e 8 marsit në Vaun e Dejës, për të inaguruar ‘Iniciativën për Gratë’ në Tri Komuna: Vau i Dejës, Tropojë & Pukë e mbeshtetur nga Delegacioni i BE-së. Fuqizimi i grave dhe vajzave nëpërmjet promovimit të talentit të tyre në punimet artizanale i forcon ato ekonomikisht si dhe zhvillon këto tri komuna. Gëzuar 8 Marsin!”.
Kaq ka mjaftuar, që qytetarët të shpërthenin me një mori akuzash ndaj saj. Ata e cilësojnë si tradhtare, e cila ka shkelur mbi gjakun e të atit të saj.
