Pas dy orësh protestë, qytetarët janë ulur para Kuvendit, duke krijuar një rreth, më në qendër ish-deputetja Kryemadhi, pranë së cilës qëndron Petrit Vasili, por edhe ish-deputetët demokratë Gazmend Bardhi dhe Endrit Hasa.
Kryemadhi dhe Bardhi u shprehën të vendosur për të vijuar qëndrimin, ndërsa ulja e tyre përkthehet si një mesazh qëndrese për vijimin e protestës mbase për disa orë të tjera.
Kryemadhi ka folur për mediat, ku ka kërkuar që t’u dërgohet ujë policëve, sepse këta të fundit nuk pranojnë ujë nga protestuesit. Sipas kryetares së LSI-së, kjo pasi efektivët janë kërcënuar se do të pushohen nga puna nëse marrin ujë nga protestuesit.
“Të shkojë policia t’ju marrë para deputetëve, t’ju sjellë ujë se po ju thahet buza policëve. Ne ua japim po ata kanë frikë se pushohen nga puna. Kush guxon të marrë ujë nga opozita, e heqin direkt. I bëj thirrje Sandër Lleshajt t’ju sjellë ujë… është një vapë e madhe. Ata janë aq të sikletosur sa nuk e marrin ujin tonë se i pushojnë nga puna”,- tha ajo.
Ndërkohë, lidhur me lajmin se Policia e Shtetit i ka dërguar Gazmend Bardhit një thirrje që të tërheqë protestuesit që tentojnë të çajnë kordonin e policisë sepse do të ketë reagim, ai tha se nuk ka marrë asnjë mesazh nga askush./ Tirana Today
