Ish-deputeti i Partisë Demokratike, Klevis Balliu ka folur rreth situatës konfliktuale tek zona e Bregut të Lumit në Tiranë, ku banorët kundërshtojnë shembjen e banesave të tyre duke u përplasur me policinë.
Balliu, deklaroi se banorët e kësaj zone nuk janë shpronësuar nga banesat, dhe as nuk u janë garantuar kushtet minimale për strehim.
“Loti i parë dhe i dytë janë shpronësuar. Të gjitha ato shtëpi kanë të njëjtën problematikë, ndërsa në lotin e tretë qeveria me Bashkinë bënë vlerësimin për shtëpitë që sot po i prishin. E i prenë në besë banorët pas një marrëveshje që patën me ta. Kjo në shkelje të hapur të ligjit. Ligji e thotë qartazi, s’mund të shpronësosh një person pa i gjetur më parë kushtet për strehim”, u shpreh Balliu.
Ndërkohë, INUV-i shembi sot banesat te Bregu i Lumit, ndërsa gjatë përplasjes që banorët patën me Policinë, u lënduan 3 persona të cilët përfunduan në spital dhe 6 të tjerë u arrestuan.
