Ish-kreu i “Aleancës Kuqezi”, Kreshnik Spahiu, ka publikuar një video me pamje të rënda, sa i takon asaj çfarë ka ndodhur në një nga protestat për vrasjen e Klodian Rashës.
Protestuesit kanë thyer dhe shkatërruar disa objekte publike në Tiranë, dhe në disa qytete të vendit. Kjo situatë është shoqëruar me arrestime të shumta.
Kreshnik Spahiu ka nxjerrë një video që po qarkullon në rrjetet sociale, ku shihet se si tërhiqet zvarrë një djalë i ri nga dy civilë, dhe i dorëzohet policisë.
“Pamje trishtuese: Populli i ndarë nga politika me urrejtje ndaj njëri-tjetrit”, shkruan ai bashkëngjitur videos në fjalë.
Kujtojmë këtu se pas Tiranës, edhe në rrethe janë zhvilluar protesta për vrasjen e 25-vjeçarit Klodian Rasha. Protesta janë zhvilluar në disa qytete si Vlorë, Lushnje, Sarandë si edhe në Librazhd, ku protestuesit kërkojnë drejtësi për të riun që u vra nga policia. Protestat e ditëve të fundit në Tiranë dhe në rrethe, kanë sjellë qindra arrestime dhe procedime penale.
