Programi i LSI, Kryemadhi: Kemi sjellë 5 ide të reja, zero kosto për buxhetin

Kryetarja e LSI, Monika Kryemadhi zhvilloi një bashkëbisedim me disa banorë të njësisë 5 në kryeqytet.

Së bashku me ish-deputetët e kësaj force politike, Petrit Vasili dhe Klajda Gjosha, Kryemadhi foli për programin e LSI, teksa u ndal në 5 propozimet e prezantuara disa ditë më parë.

Sipas saj, propzimet dhe idetë e shpalosura në program, janë shumë të thjeshta dhe implementimi i tyre nuk do të ketë asnjë lloj impakti në buxhetin e shtetit.

Monika Kryemadhi: ”LSI solli 5 ide të reja. Pesë ide të reja shumë të thjeshta. Nuk kanë absolutisht asnjë lloj impakti në buxhet, pra nuk i kushtojnë buxhetit të shtetit, nuk i kushtojnë xhepave të shqiptarëve. Përkundrazi, shtojnë para në xhepin e shqiptarëve, shtojnë para në buxhetin e shtetit, çlirojnë ekonominë shqiptare, krijojnë hapësira investime, e bëjnë vetë shtetin shqiptar dhe politikën për të pasur një vizion. Dhe kjo lloj ndjesi pozitive dhe komoditeti që më kanë dhënë, më krijoi një lloj besimi për ta vazhduar, për ta implementuar dhe për të vazhduar për të folur me njerëzit për programin.”