Partia Demokratike pritet të dorëzojë në Kuvend kërkesën për të ndërhyrë në disa nene, të cilët do të sjellin Vetting në politikë, ndryshim të hartës territoriale dhe reformë zgjedhore. Kjo forcë politike ka futur një sërë përcaktimesh të forta, të cila prekin shumë emra të rëndësishëm të politikës.
Personat që do të futen në Vetting janë: Deputeti i Kuvendit të Shqipërisë, Kryeministri dhe Ministrat, Presidenti i Republikës, kryetari i Bashkisë, Guvernatori i Bankës së Shqipërisë, Kryetari i Kontrollit të Lartë të Shtetit, Avokati i Popullit dhe Drejtori i Shërbimit Informativ të Shtetit. Por ashtu siç ndodh me Vettingun në drejtësi, PD ka kërkuar që të ketë një skaner të imët të familjarëve dhe personave të afërt të politikanëve. Kjo do të thotë se nëse i shkohet deri në fund propozimit për Vettingun në politikë, një pjesë e madhe e pushtetarëve do e gjejnë veten jashtë.
“Kontrollit i nënshtrohen edhe personat e lidhur me funksionarin publik të përmendur në pikën 1, ku përfshihen bashkëshorti/ja, bashkëjetuesi/ja, fëmijët në moshë madhore, si dhe çdo person tjetër i përbërjes familjare të këtyre funksionarëve.
Në rastet e përcaktuara nga ligji, kontrollit i nënshtrohen edhe persona të tjerë të lidhur me funksionarin publik ku përfshihen bashkëshortët e fëmijëve në moshë madhore, vëllezërit dhe motrat dhe bashkëshortët e tyre, personat me miqësi të njohur apo lidhje familjare me funksionarin publik, një zyrtar apo person tjetër me lidhje varësie, qoftë edhe të tërthortë, për shkak të funksionit publik me funksionarin në fjalë, si dhe çdo person fizik apo juridik me të cilin zyrtari ka pasur ose ka marrëdhënie interesi të çfarëdo lloji”, thuhet në draft.
