Një ditë pas marrëveshjes për Reformën Zgjedhore, kryedemokrati Basha ka takuar disa biznese në Tiranë, që sipas tij janë të prekur nga situata e shkaktuar nga COVID-19. Ai shigjetoi sërish kryeministrin Rama, ndërsa iu bëri thirrje qytetarëve që të bëhen bashkë ta largojnë.
Një qytetare që u prezantua nga Lulzim Basha si pronare e një biznesi, gjatë bashkëbisedimit e vendosi në vështirësi me pyetjet e shumta. Ajo e ka pyetur Bashën, se po e zgjodhën kryeministër, çfarë do të bëjë ai. Ndërkohë, kreu i PD-së i përgjigjet se do zbatoj ligjin.
Dialogu i Lulzim Bashës me qytetaren
Lulzim Basha: Përshëndetje të dashur miq, jemi në zemër të Tiranës. Si shumë biznese të tjera janë në vështirësi të dyfishtë.
Qytetarja: Nuk kemi marrë asnjë kokërr leku, të shkojmë t’ja marrim në Surrel, tani do edhe lekë të shkosh atje, se kur e kishim këtu…Ishalla kur të vini ju të na i jepni, apo nuk do na i jepni?
Lulzim Basha: Të gjitha dëmet, shteti duhet t’ua dëmshpërblejë
Qytetarja: Kush shtet?
Lulzim Basha: Shteti shqiptar, po varet çfarë kryeministri në krye, një që mendon vetëm për veten e tij dhe oligarkët
Qytetarja: Po të zgjodhëm ty, çfarë do të bësh, do na i kthesh?
Lulzim Basha: Do të zbatoj ligjin, jo tarafet dhe nuk do të shikoj xhepat e 5 oligarkëve
Qytetarja: Po pronat si do i bësh?
Lulzim Basha: Do të flasim për një moment, para një jave e kisha z. Vorpsi në zyrë dhe shoqatat e pronarëve. Gjëja e parë që do të bëjmë do të anulojmë ligjin, por prit një herë para se të flasim për pronat, të flasim një çikë për bizneset se jemi LIVE.
Qytetarja: Ishalla bëhtë më mirë Zoti kur të vini ju, se po nuk pat shpresë edhe te ju, mori fund Shqipëria.
