Në 5 shtator të vitit 2016-të, në një ceremoni madhështore në sheshin “Shën Pjetri” në Vatikan, u shenjtërua Nënë Tereza. Kështu në nder të Ditës Botërore të Bamirësisë, i gjithë fokusi i shtuar është në frymën e aktiviteteve humanitare dhe nevojën për të bërë bamirësi. Por, sa bamirës janë shqiptarët dhe të rinjtë e sotëm?
Drejtuesi i fondacionit “Fundjavë Ndryshe”, Arbër Hajdari i ftuar në emisionin Wake Up në Top Channel u shpreh se numri i të përfshirëve në aktivitete humanitare sa vjen e po rritet. Kjo pasi sipas tij, përkundër nga çfarë mendohen shpesh, në Shqipëri ka një ngritje të frymës për të bërë bamirësi.
“Për 1 familje arrihet që të dhurojnë 25 mijë donatorë, që janë shqiptarë që jetojnë në Shqipëri, por edhe jashtë. Kjo do të thotë që ka një numër njerëzish që e kanë rritur dëshirën e tyre, kanë krijuar besimin e duhur dhe marrin pjesë në aktivitete.
Shqiptarët për mendimin tim është shumë e thjeshtë që t’i nxitësh, mjafton vetëm të jesh transparent. Rasti më i fundit që ne i kemi siguruar edhe shtëpi katër vajzave jetime nga Dibra, angazhoi rreth 50 mijë njerëz brenda dhe jashtë Shqipërisë.
Ka një numër të madh familjesh që po synojnë të sjellin fëmijët e tyre për të qenë pjesë e aktiviteteve sociale. Ashtu siç ka një rritje të numrit të aktiviteteve që ne po bëjmë. Moshat që angazhohen më shumë si vullnetarë fillojnë që nga 15 vjeç e deri 23 apo 24 vjeç. Mendoj se ne kemi një rini të mirë, vetëm ne kemi rreth 11 mijë vullnetarë që janë të gjithë të rinj. Ka shumë prej tyre që ndoshta nuk kanë para për të dhuruar, por kanë gjënë ë tyre më të vyer, kohën. Dhe e vënë në dispozicion të aktiviteteve sociale.”
Ndër të tjera, Hajdari tha se bamirësit më të mëdhenj në vendin tonë, janë rrogëtarët, vetë njerëzit e thjeshtë. Por, edhe bizneset e mëdha sa vijnë edhe janë më të përfshirë në nisma të ndryshme sociale.
“Bamirësia është një element shumë i madh, i kap të gjitha kategoritë e njerëzve. Ne kemi edhe pleq që dhurojnë pensionin e tyre. Po ashtu edhe biznesmen të fuqishëm në Shqipëri, edhe bëjnë tre shtëpi përnjëherë.
Në rastin e “Fundjavë Ndryshe” bamirësit më të mëdhenj janë rrogëtarët. Por, kjo nuk lë jashtë biznesin e madh që ka qenë shumë prezent në aktivitetet apo çdo thirrje që ne kemi bërë.”
Drejtuesi i fondacionit foli edhe për projektin më të madh të ndërtuar në Ballkan, ku bëhet fjalë për qendrën sociale. Në të cilën do të krijohen lehtësi dhe mundësi për të ndihmuar çdo grupmoshë. Duke i siguruar mundësinë për një zanat, i cili pas disa muajsh do t’i sigurojë edhe punë. Por, njëkohësisht, Hajdari shtoi se janë duke menduar edhe për moshën e tretë.
“Që prej 26 majit të këtij viti jemi duke punuar për të bërë qendrën më të madhe sociale në Ballkan. Është një qendër që është rreth 50 mijë metra katror, është ish-reparti i vjetër ushtarak. Ku ne kemi menduar që të zhvillojmë një qendër të madhe profesionale, ku do të përfshihen zanatet kryesore për të cilat tregu ka nevojë.
I kemi kërkuar gjithë bizneseve në Shqipëri që të na sjellin listat se për çfarë zanatesh kanë nevojë. Janë të pozicionuara biblioteka, kapanone të mëdha magazinimi për të mbuluar gjithë Shqipërinë. Po ashtu kemi menduar të krijojmë dhe një azil pleqsh.”/ TIRANA TODAY
