Një nga konkurrentët i cili u pranua natën e “Për’puthen Prime”, i quajtur Bakiu, pati një rrugëtim tejet të shkurtër, pasi ai kishte gënjyer produksionin. Bakiu kishte marrë pjesë më herët në një program të ngjashëm, dhe kjo sipas prezantueses Bora Zemani, bie ndesh me rregullat e produksionit.
“Do të ndalem te një prej djemve të rinj që u prezantua natën e Prime-it, te Baki. Gjatë fazës së audicioneve, konkurrentët pyeten dhe për të shkuarën e tyre televizive, nëse kanë qenë ndonjëherë pjesë e programeve televizive. Sepse një nga kushtet është se nuk duhet të kenë qenë pjesëmarrës në programe të tjera, për të shmangur kështu dyshimet se këtu vijnë për qëllime të tjera dhe jo për qëllimin kryesor: për dashurinë.
Baki tregoi se nuk ka pasur të shkuar televizive, por pas prezantimit të tij ishin vetë fansat që evidentuan që ai ka qenë pjesë e një tjetër programi, reality-show i ngjashëm me “Për’puthen”. Patjetër që kjo e penalizon atë”, tha Bora.
Arjani, i revoltuar për këtë situatë, tha se shikueshmëria e këtij programi stimulon mendjet perverse, të cilat kërkojnë të arrijnë famën me anë të gënjeshtrave.
“Nuk e kuptojmë se kush vjen për famë, kush për dashurinë, kush për të dal në televizion, do ta kemi gjithmonë problem këtë, sepse shikueshmëria e këtij programi stimulon mendjet perverse, të cilat kërkojnë të arrijnë famën nëpërmjet gënjeshtrave”, tha Arjani.