Ndërsa Prokuroria e Posaçme (SPAK) po shkon drejt fundit të hetimeve tek tenderi i fryrë i tunelit të Llogarasë, ministrja e Energjisë dhe Transporteve, Belinda Balluku është shfaqur në fundjavë në Stamboll, në një forum të organizuar drejtpërdrejt nga presidenti Erdogan. Zyrtarisht, për diskutime mbi transportin dhe ndërlidhjen, por në fakt dyshimet janë një përpjekje për të thyer akullin dhe për të ngrohur raportet në një moment delikat. Marrëdhënia midis Edi Ramës dhe Erdoganit ka marrë goditje të mëdha për shkak të premtimeve të pambajtura nga ana e kryeministrit për mosdorëzimin e gylenistëve që “Sulltani” kërkon me ngulm prej kohësh. Tenderi i Llogarasë, që u dha një kompanie të lidhur ngushtë me një prej njerëzve më të afërt të Erdoganit, ish-deputetin dhe fqinjin e tij Abdulkadir Kart, ishte një nga ato “veprime” për të rivendosur ekuilibrat në këtë marrëdhënie të ngrirë. Skema ishte mbyllur në një takim sekret në Ankara mes Ramës, Ballukut dhe përfaqësuesve të kompanisë turke, ku fituesi u përcaktua para hapjes zyrtare të tenderit. Dëshmia e ish-ministrit në arrati Arben Ahmetaj hedh dritë mbi pazarin e errët që solli një tender të fryrë me 30 milionë euro më shumë, për një projekt ku kompania turke nuk realizoi asnjë punim. Ndërsa SPAK i afrohet zbardhjes së skandalit, Balluku mesa duket po kërkon me çdo kusht mbrojtje politike dhe ndihmë nga Erdogan, ndërkohë që rrezikon të përfundojë para drejtësisë për implikimet e saj në këtë aferë.
Çfarë thuhet në dosje?
Sipas dosjes që ndodhet në tryezën e SPAK, projektit të tenderit të tunelit të Llogarasë iu fryn kostot me 30 milionë euro, që i shkuan një kompanie turke, e cila nuk bëri asnjë punim. Gjithashtu, kemi të bëjmë me një fitues të përcaktuar, pas një takimi në Ankara, të zhvilluar në datën 3 Qershor 2021, 21 ditë para rishpalljes së tenderit. Në këtë takim ka qenë e pranishme Belinda Balluku dhe kryeministri Edi Rama. Por si u arrit kjo marrëveshje që rrezikon t’i bëjë “gropën” Ballukut? Ministrja njoftoi zyrtarisht në tetor 2021, se fitues i zbatimit të projektit që lidh Vlorën me Palasën ishte shpallur bashkimi i konsorciumit turk: – INTEKAR YAPI TURIZM ELEKTRIK INSAAT SANAYI VE TICARET LIMITED NIPT 4780437420 (regjistri i biznesit ne Stamboll) – SIRKETI ASL INSAAT TAAHHUT VE SANAYI TICARET LIMITED SIRKETI me NIPT 0860072787. Një muaj pasi fituan tenderin, në nëntor 2021, konsorciumi turk i kompanive themeluan në Shqipëri degën e tyre “INTEKAR – ASL”. Kompania “INTEKAR YAPI TURIZM ELEKTRIK INSAAT” zotëron 30% të aksioneve me përfaqësues Serkan Çam dhe kompania tjetër “ASL INSAAT TAAHHUT” zotëron 70% të “INTEKAR ASL” me përfaqësues Abdulkadir Kart.
