Zyrtarët e PD-së kanë blinduar sërish derën kryesore të selisë, këtë herë edhe nga jashtë. Kjo masë vjen kur kanë kaluar tre ditë nga protesta e thirrur nga ish-kryeministri Sali Berisha.
Ende nuk ka një informacion se përse ka ndodhur blindimi i derës kryesore, dhe se nga cfarë i frikësohen. Në 8 janar, mbështetës të ish-kryeministrit Sali Berisha hynë me forcë brenda zyrave të PD-së dhe shkatërruan gjithçka, përfshirë këtu edhe zyrën e kreut të saj, Lulzim Basha.
Basha mblodhi në seli Kryesinë, e cila vendosi që ish-lideri historik i Partisë Demokratike, Sali Berisha, të përjashtohet përgjithmonë nga Partia Demokratike.
Evi Kokalari e cila ka shoqëruar thuajse në çdo “Foltore” Sali Berishën, është tërhequr nga politika dhe nga Komisioni i Rithemelimit të PD-së. Ky vendim ka ardhur menjëherë pas protestës së dhunshme të 8 janarit, thirrur nga Berisha. Kokalari shprehet se marrja me “Foltoret” nga shtatori, i ka lënë pas dore jetën personale. Megjithatë ajo thotë se komunikimin me demokratët do e vijojë përmes rrjeteve sociale.
