Kryedemokrati Lulzim Basha ka folur nga selia e PD-së, nga ku ka mbyllur protestën pas tre orëve.
Ai theksoi se zgjedhje me Edi Ramën nuk do të ketë, ndërsa falënderoi të gjithë protestuesit për pjesëmarrjen e tyre.
“Zgjedhje me Maduron e Ballkanit nuk do të ketë. Kjo qëndresë ka nisur për t’i kthyer qeverisjen çdo shqiptari dhe nuk do të ndalet. Askush nuk është këtu për karrige, për pushtet e për pazare por për t’i dhënë fund pazareve në kurriz të popullit, në kurriz të demokracisë.”
Më tej, lideri i PD-së tha se “të gjithë ne i kemi borxh të madh Shqipërisë për ta çliruar nga të këqijat që e kanë marrë peng ndër vite”.
“Shpresa i ka hapur krahët e saj e po mbulon vendin tonë. Shpresa fillon me largimin e bandës së hajdutëve dhe kryehajdutit Edi Rama. Të gjithë ne i kemi borxh të madh Shqipërisë, ta çlirojmë nga të gjitha të këqijat që e kanë marrë peng ndër vite. Zotohem se nuk ka forcë mbi tokë t’ju tradhtojë ju, të tradhtojë këtë lëvizje për liri e demokraci për standarde evropiane dhe se do bëhet realitet verdikti juaj për Shqipërinë si gjithë Evropa.
Kjo është beteja për të cilën luftojmë, do e vazhdojmë deri në fitore.”/ Tirana Today
