Ish-ministri Damian Gjiknuri, i ftuar në emisionin ‘Mbrëmje ide’ ka folur për akuzat e ngritura nga PD dhe LSI për shit-blerje votash në zonën elektorale të Dibrës.
Gjiknuri shprehet se ndaj tij nuk ka nisur asnjë hetim nga Prokuroria, ndërsa ka kërkuar që nëse opozita ka në dosje emrin e tij, ta nxjerrë.
Përsa i përket ‘Dosjes 339’, sipas tij është një dosje e cila ka të bëjë me hetimin e një grupi kriminal për trafikun e drogës dhe jo për shit-blerjen e votës.
“Si mund të blihen me mijëra vota? Ne nuk kemi një rast të provuar. Edhe këta që pretendojnë marrin rastin e dosjes 339. Çfarë është dosja 339? Ky është një rast që ka të bëjë me hetimin e një grupi kriminal për trafikun e drogës”, tha ish-ministri.
Gjiknuri theksoi se nuk ka asnjë akuzë apo provë kundër tij, por thjesht aludime.
I pyetur nga gazetarja nëse shqetësohet nga akuzat, ai përgjigjet:
“Unë jam mësuar me politikë. Po të vini re PD godet figura politike me peshë elektorale. Kjo është logjike. Jam goditur unë, mund të jetë goditur Vangjushi ose dikush tjetër sepse jemi njerëz që kemi peshë elektorale dhe kemi sjellë fitore.
Jua them me garanci të plotë se nuk ka asnjë strukturë kriminale të lidhur me PS në funksion të votave”, deklaroi Damian Gjiknuri.
