Sikundër bashkëshorti i saj, presidenti Ilir Meta, edhe kryetarja e LSI-së Monika Kryemadhi duket se është bindur për të mbajtur maskë, ndërsa jemi në një periudhë pandemie.
Nga Shkodra, Kryemadhi tha se do të pëlqente të mbante një maskë të kuqe dhe me logo të LSI-së. Kjo lëvizje nga ana e Kryemadhit vjen dy ditë pasi Ilir Meta u shfaq për herë të parë me maskë.
Presidenti tha se e ka tmerr maskën, por do fillojë ta mbajë për solidaritet. Ndërsa Kryemadhi është gjobitur disa herë nga policia, dhe është shprehur më herët se virusi nuk ekziston. E ndërsa nga Shkodra sot deklaroi se kjo maskë nuk të mbron nga pandemia, por mbulon dhimbjen që ka pushtuar këtë vend.
“Edi Rama u’a ka marrë frymën të gjithëve me taksat, me pandeminë, me tërmetin, me gjobat. Por ka një zgjidhje, një shpëtim. Nuk jam unë, nuk është LSI-ja, por jeni ju që do të ktheni sytë dhe dritën tek familja juaj, tek shkolla juaj, tek profesorët tuaj.
E tha pak më parë Klismani, që kjo maskë gjobitesh me 4 ditë pune, për ata që janë në punë se për ata që nuk janë në punë nuk kanë ç’të paguajnë. Kjo maskë nuk të mbron nga pandemia, por mbulon dhimbjen që ka pushtuar këtë vend.
Unë do ta mbaja me kënaqësi maskën me LSI, me ngjyrën e kuqe. Edi Ramës nuk i pëlqen ngjyra e kuqe, nuk i pëlqen ngjyra e flamurit. Edi Rama ndryshoi edhe ngjyrën e flamurit të PS-së, nga e kuqe në mavi. Mua më pëlqen ngjyra e kuqe, sepse është ngjyra e dashurisë, është ngjyra e trëndafilave dhe në Shkodër janë në çdo oborr shkodran. Edi Rama e shkatërroi PS-në dhe e ktheu partinë në një sekt”, tha ajo.
